Notisia

Kaminda temporal pa konektá ròtonde Pater Euwensweg/ Hamelbergweg ku Megapir Tula.

Geplaatst op 31 Òktober 2017 dor di Ministerio di Tráfiko, Transporte i Planifikashon Urbano

Willemstad  - Servisio pa Obra Pùbliko (OW) ta anunsia komienso di trabounan pa traha un kaminda temporal ku ta konektá e ròtonde riba Pater Euwensweg/ Hamelbergweg den Otrobanda ku e futuro sitio di Megapir Tula.

 

E trabounan a kuminsa for di djaluna 30 di òktober i ta kontinua te ku 10 di novèmber, pues tin un durashon di 2 siman. Pa motibunan inesperá, no a publiká e informashon mas adelantá i OW ta pidi diskulpá pa esaki. A kuminsa di forma aselerá pa alkansá e fecha tentativo den novèmber pa inougurashon di Megapir Tula. Esaki sigur lo ta un empuhé grandi pa ekonomia di nos pais.

 

Esaki ta bira e di dos kaminda pa outomobilistanan por yega Megapir Tula na momentu ku inougure. Tin un konekshon kaba awor aki pa outomobilistanan por yega Megapir i Megapir Tula via di Baden Powellweg, kual ta e kaya ku ta pasa dilanti di Cinemas Curacao, Renaissance Hotel ets.

 

Ta traha den e area di Rif pabou di Banko di Seguro Sosial (SVB) i entre Stadion di Rif i Pisina Benny Leito. E kontratista enkargá ku e trabounan aki ta MNO-Vervat. Solamente tráfiko ku mester yega Stadion di Rif i Pisina Benny Leito lo mester tene kuenta ku e trabounan aki. OW ta pidi un i tur pa komprenshon durante di ehekushon di e trabounan aki.

 

Pa kualke informashon por tuma kontakto ku OW atraves di email info.vvrp@gobiernu.cw, por yama 465-1477 òf manda un mensahe via di Whats App na e number di telefon +599511-8582.

 

Ministerio konserní

Bo opinion