Notisia

KAP tin un rektor nobo entrante 2019-2020

Geplaatst op 19 Yüni 2019 dor di Ministerio di Enseñansa, Siensia, Kultura & Deporte

Willemstad- Entrante e aña eskolar nobo Kolegio Alejandro Paula (KAP) konosé un rèktor nobo den persona di sra. Drs. Pamela Burrichter- Lapeña Rojer. 

Despues di a kana un trayekto di solisitut i selekshon di algun luna, siguí pa un TMA-assesment i un entrevista profundo, sra. Burrichter- Lapeña a resultá e kandidato ku a keda proponé dor di e Komishon di Reklutashon. E rèktor entrante ta disponé di tantu konosementu teóriko komo práktiko di maneho i di enseñansa. Ademas e ta disponé di eksperensia den sektor privá riba tereno di rekurso humano. Aktualmente e ta laborando na KAP i tin enkargo alabes di trabounan di kordinashon pa VWO 4+5 i trabounan di relashonista públiko di e skol.

Un felisitashon ta bai na e rèktor nobo i Minister di Enseñansa, Siensia, Kultura & Deporte sra. Marilyn Alcalá-Wallé a yama e rèktor bonbiní na e tim ku ta hasiendo di nos skolnan públiko, skonan magnétiko!

Riba e potrètnan por mira: Sra. Jeannette King, funshonario di enseñansa sekundario (onderwijsfunctionaris voortgezet onderwijs), sra. Drs. Pamela Burrichter- Lapeña Rojer, Minister Marilyn Alcalá-Wallé, sr. Wladimir Kleinmoedig, direktor di Sektor Enseñansa i Siensia i alabes enkargá ku Skolnan Públiko/DOS.

Ministerio konserní

Bo opinion