Notisia

Karniseronan ta haña kurso pa amplia konosementu di e manera pa atendé ku karni

Geplaatst op 7 Mart 2019 dor di Ministerio di Salubridat Públiko, Medio Ambiente i Naturalesa

Willemstad – E sentro di ekspertisio Hulandes SVO (Slagersvakonderwijs) a duna dos kurso den promé i último siman di febrüari. Diferente supermerkado i mayorista manera; Alves, EWT, Deli Nova, Esperamos, Van den Tweel i Vleeskeuringsdienst di Openbaar Lichaam St. Eustatius, a inskribí algun di nan personal pa partisipá pa amplia nan konosementu.

Ta trata aki di konosementu di karni, kaminda e karnisero ta siña konosé e diferente partinan di e diferente sortonan di animal (baka, porko, kabritu, lamchi i galiña) i tambe kon konsehá e konsumidó pa loke ta trata manera di prepará i ternura (malsheid) di diferente sorto di karni.

Alabes a ofresé e kurso di HACCP/ seguridat alimentario, kual a keda duná na tres diferente grupo di kursista.

Ku e base aki doñonan di supermerkadonan a manda un señal ku pa nan seguridat i profeshonalidat tambe ta importante i di e manera aki ta redusí e chèns di presensia i plamamentu di bakteria ku ta hasi hende malu. Ta p’esei e sektor a bini ku e inisiativa aki den estrecho koperashon ku Asuntunan Veterinario kual alabes a pone un bon base pa sigui traha huntu den futuro.

Pa Asuntunan Veterinario ku ta enkargá ku kontròl riba establesimentunan ku ta bende karni, esaki ta inisio di un trayekto di estudio kontinuo pa esnan ku ta enkargá ku e alimentonan delikado aki i asina tambe a establesé e “public- private partnership”. Den luna di òktober lo duna tambe un kurso relashoná ku piská i lo ripití e kurso aki ku resientemente a keda duná.      


Riba potrèt, por mira momentu ku kursistanan ta haña demostrashon.

Riba potrèt, Minister di GMN mr. Suzanne Camelia- Römer

flankeá pa kursistanan di Esperamos Supermarket ku a risibí sertifikado.


Riba potrèt, por mira otro grupo di kursista ku tambe a risibí sertifikado.     

 

                                                                        ###

Ministerio konserní

Bo opinion