Notisia

Kiko e Konbenio di Koperashon entre Kòrsou i Ulanda ta enserá?

Geplaatst op 25 Yanüari 2019 dor di Ministerio di Asuntunan General i Promé Minister

Na komienso di e siman aki, durante di e Bon Bini for Business summit kaminda a honra bishita di Promé Minister Mark Rutte, Gobièrnu di Kòrsou ofisialmente a firma un konbenio di koperashon ku Gobièrnu di Ulanda. Ku firmamentu di e konbenio aki Kòrsou a drenta un fase nobo pa ku su relashon ku Ulanda.

Punto di salida den e kuadro aki ta e inisiativa ku Gobièrnu di Kòrsou a tuma pa traha riba 3 área di desaroyo ku ta 1) Ekonomia, 2) Finansia públiko i 3) Aparato gubernamental. Ròl di Ulanda den esaki no ta pa yuda ku fondo, pero pa duna sosten tékniko kaminda surgi e nesesidat (esaki entre otro den forma di rekurso humano i konosementu). Ademas e konbenio ta delineá di ki forma ambos pais mester atendé mihó ku otro a base di igualdat i rèspèt mutuo.

Puntonan esensial ku ta bini dilanti den e konbenio ta:

  • Kada pais ta mantené nan propio responsabilidat, tarea i outoridat den Reino i tambe pa ku otro;
  • Ulanda ta pone na disposishon un konsehero di transishon (transitiebegeleider) pa yuda identifiká proyekto- i inisiativanan ku tin e potensial pa aselerá e proseso i asina krea e resultadonan deseá di forma mas efektivo i efisiente. Tambe pa duna guia i teps pa di e forma aki pasa konosementu na e aparato públiko, kreando asina un impakto duradero;
  • Ulanda lo fasilitá, kaminda ta deseá i ta nesesario, ekspertonan adekuá riba tereno di gobernashon i finansas pa yuda fortifiká i pasa konosementu na e aparato públiko;
  • Ulanda lo kompartí ku Kòrsou konosementu ekstenso pa loke ta trata eksplotashon di tereno i maneho di propiedat di Gobièrnu di Kòrsou, ku ta benefisiá i yuda mehorá finansia públiko;
  • E strategia di kresementu ta un proseso a largo plaso, indikando ku Kòrsou i Ulanda lo sigui determiná unda yudansa ta nesesario a base di nesesidatnan ku surgi;
  • Ku posibel gastunan mará na e puntonan ariba menshoná lo ser determiná a base di akuerdonan konkreto ku gradualmente lo agregá komo apèndiks na e kombenio aki.  

Den e siguiente entrevista Promé Minister Eugene Rhuggenaath ta duna mas detaye tokante tantu kontenido komo propósito di e konbenio, i tambe e benefisionan ku esaki ta trese pa Kòrsou.

Ministerio konserní

Bo opinion