Notisia

KOMBATIMENTU DI SANGURA DESPUES DI ÁWASERU TA ASUNTU DI NOS TUR

Geplaatst op 17 Òktober 2019 dor di Ministerio di Salubridat Públiko, Medio Ambiente i Naturalesa

Willemstad – Servisio di Salú Públiko di Kòrsou  (UO G&Gz ántes GGD) ta aksentuá riba e importansia pa eliminá lugánan di brui di sangura prinsipalmente despues di áwaseru.

SI NOS TUR DUNA UN MAN SANGURA NO TIN CHÈNS DI BRUI.

Akshon ku kada persona mester tuma

Responsabilidat di kada persona ta pa eliminá fokonan kaminda sangura a òf ta pone webu. Mester kontrolá tur kaminda ku awa a keda para. Tuma e siguiente akshonnan den i rondó di bo kas:

-        Kontrolá paden i pafó di kas. Kaminda por, wak den kurá di bo bisiña tambe i informé di esaki;

-        Rekohé tur artefakto òf opheto ku por kontené awa i tira esakinan afó;

-        Kambia awa di animalnan tur dia pa awa fresku;

-        Den kaso ku tin bichi òf larva i/ òf pupa den awa, tira esaki den mata pa asina eliminá nan;

-        Chèk tur skòter bou di pòchinan di mata pa bichi/ larva di sangura;

-        Kambia awa den glas òf pòchi tur siman i tambe pasa skeiru, bròsh òf parti gròf di spòns kita e webunan (punta pretunan) di sangura. Ta rekomendabel pa yena santu òf tera òf pone larvisida den e awa;

-        Tur renbak mester ta hermétikamente será. Si e ta habrí, por pone piská ku ta kome bichi aden. Por usa larvesida tambe aden pa mata bichi di sangura. Tene kuenta ku no por usa piská i larvisida huntu paso e larvisida por afektá e piskánan;

-        Chèk barí i drùms di awa, tapa nan bon pa evitá ku sangura ta pone webu den nan i den e kaso aki tambe por tira larvisida den e awa;

-        Warda tur artefakto pará den kurá manera tayer, drùms, barí, kosnan di plèstik, ko’i hunga di mucha i slòf di plèstik òf otro artefaktonan ku por kontené awa bou di dak di manera ku áwaseru no por keda para den esakinan;

-        Chèk het di dak i limpia esaki; saka tur blachi ku por stroba awa di kore.

 

Siklo di sangura

Sangura fuera di ta molestioso e ta kousante di Dengue, Chikungunya i Zika si nos duna esaki chèns. P’esei ta importante pa sa kon e sangura su siklo di bida ta.

E sangura muhé ta pika pa haña sanger pa fertilisá i produsí su webunan. Despues e sangura muhé ta buska awa pa pone su webunan aden. Esaki por ta di fo’i un tapa di bòter di limonada te kualkier opheto òf lugá kaminda awa ta keda pará. Den un lapso di 7 pa 10 dia e webunan ta

 

krese bira pupa, despues larva i despues sangura adulto. Un sangura por biba entre 4 pa 6 siman i un sangura muhé por pone te ku 400 webu den su bida.

Uzo di larvisida

Personanan ku ta fangu awa den barí òf drùms por buska larvisida grátis na UO G&Gz na Piscaderaweg 49 di djaluna pa djabièrnè entre 8’or di mainta pa 12’or di mèrdia. E larvisida ta BT.I.  (Bacillus Thuringiesis Instraeli) i e ta efektivo kontra tur sangura na Kòrsou. E produkto no ta tóksiko pa e ser humano ni pa bestia i ta konsehá pa sigui e instrukshon riba e etikèt. Den kaso ku tin awa pará den kurá òf áreanan grandi tambe por usa e larvisida. Pa mas informashon por tuma kontakto ku profeshonalnan di THZ- sekshon di kombatimentu di sangura na 432 2867, 432 2885 òf 462 2040.

Ta importante pa nos tur huntu ta bon informá pa asina nos huntu kombatí e sangura ku ta transmití Dengue, Chikungunya i Zika.

 

                                                                       ###

 

Ministerio konserní

Bo opinion