Notisia

Komishon di Konseho pa S.S.C.

Geplaatst op 8 Mart 2018 dor di Ministerio di Enseñansa, Siensia, Kultura & Deporte

Sra. Minister Marilyn Alcalá-Wallé na nòmber di Gobièrnu di Kòrsou a ofishalisá e instalashon di “Adviescommissie di Stichting Studiefinanciering Curaçao” (S.S.C.). E inisiativa aki ta pa evaluá e maneho di finansiamentu di estudio i kobransa pa trese esaki mas den konkordansia ku e Plan pa Desaroyo Nashonal i tambe pa evaluá e organisashon ku ta ehekutá e maneho di gobièrnu, segun e Akuerdo di Gobernashon 2017-2021. Di e forma aki gobièrnu ke sigui garantisá oportunidat pa nos hóbennan i nos komunidat por sigui estudionan segun nan kapasidat i mantiendo e debe den un margen pagabel.  

Den kuadro di esaki a instalá un komishon ku ta konsistí di diferente eksperto saliendo for di diferente disiplina, kual ta:
Un representante di Minsterio di Enseñansa, Siensia, Kultura di Deporte (ESKD), direktor di maneho di ministerio di ESKD, konsehero hurídiko di ministerio di ESKD, un representante di ministerio di Finansas, unu di Hustisia, unu di ministerio di Asuntonan Soshal i di Labor, unu di Asuntunan General, unu di S.S.C. i tambe un eksperto eksterno. E miembronan ta: sra. Minister Marilyn Alcalá-Wallé, sra. Sahayra Braun-Nisbet, sra. Susan Larmonie-van Heydorn, sra. Rossy Reyna, sra. Josine Natividat, sr. Sacho Bakker, sr. Aron Merite, sr. Marlon Martina, sra. Mari Getrouw, sr. Roderick Palm, sr. Sharlon Cornelia, sra. Ada Tromp i sra. Varely Luidens.

Por tuma kontakto ku e komishon via di sra. Rossy Reyna pa kualke informashon na +5999 732 42 50.

E komishon aki tin e siguiente tareanan:
1. Bini ku un sistema nobo di finansiamentu di estudio, saliendo for di e punto di bista di debe akumulá pagabel, efisiente i efektivo pa por studia na Kòrsou, Europa i region;
2. Krea kondishonnan pa por studia ku éksito den eksterior;
3. Krea kondishonnan pa oumentá oportunidatnan pa studiantenan kore stazje durante nan estudio pa asina nan por terminá nan estudio ku éksito;
4. Evaluá e maneho aktual di pago di debe di estudio i trese adaptashon den e regimen di pago bèk saliendo for di un punto di bista rasonabel;
5. Krea areglonan legal den kuadro di finansiamentu di estudio i pago bek di debe di estudio;
6. Instituí un “helpdesk” di “Dienst Uitvoering Onderwijs (DUO)” na Kòrsou, saliendo for di e nesesidatnan di esnan ku tin ku paga nan debe bèk;
7. Yega na un maneho kaminda ta stimulá remigrashon di studiantenan ku a finalisá nan estudio pa regresá Kòrsou, pa asina fortifiká nos merkado laboral;
8. Evaluá e funshonamentu di e organisashon ku ta enkargá ku finansiamentu di estudio na Kòrsou, e asina yamá S.S.C;
9. Saliendo for di e puntonan di atenshon ariba menshoná, yega na un aserkamentu integral di e Sistema di finansiamentu di estudio, e Sistema di pago di debe di estudio i tur e faktornan ku tin di haber ku esakinan.

Ku esaki Gobiérnu di Kòrsou ta garantisá ku tur hóben den nos komunidat por sigui desaroyá nan mes na nan máksimo.

 

Ministerio konserní

Bo opinion