Notisia

Komishon di Supervishon di Hustisia a honra kliente Zahir Dalnoot i su tim

Geplaatst op 11 Desèmber 2018 dor di Ministerio di Hustisia

Willemstad- Djaluna último, durante di e último reunion pa e aña aki, 2018, e Komishon di Supervishon di Hustisia i Tim di Maneho di SDKK, e Komishon a tuma i duna espasio pa honra sr. Zahir Dalnoot i su tim ku a gana na luna di novèmber último e premio ‘Social Innovation Award, ku a wòrdu otorgá dor di Curaçao Innovation and Technology Institute.

Durante di e momento aki e presidente di e Komishon a ekspresá, na nòmber di e Komishon den su totalidat, nan gratitut i alabes duna sr. Dalnopot i su tim e palabranan elokuente i di sosten pa nan por sigui ku e desaroyo positivo aki.

E presidente di e Komishon a duna di konosé ku nan ta hopi orguyoso komo Komishon di Hustisia di por ta parti di un logro asina eksepshonal. Sigur pa loke ta trata desaroyonan positivo den SDKK.

Alabes nan a duna nan palabra di sosten pa si na kualke momentu s.r Dalnoot i su tim òf Tim di Maneho di SDKK mester di nan sosten pa por sigui duna aporte na e tipo di proyektonan positivo aki nan lo hasi nan máksimo esfuerso pa komuniká esaki ku Minister di Hustisia sr. Quincy Girigorie.

Sr. Dalnoot i su tim i sigur e Tim di Maneho di SDKK a apresiá e akshon di sorpresa aki di parti di e Komishon di Supervishon di Hustisia.

Finalmente e Komishon a ekspresá ku tabata un aña fruktífero kaminda e Komishon i e Tim di Maneho di SDKK a deliberá mensualmente pa aliviá situashonnan agudo ku tabata i ainda ta presentá den SDKK.

Un ‘update’ pa ku e trayekto ku sr. Dalnoot i su tim a enkaminá despues ku nan a gana e premio, ta ku sr. Dalnoot su produkto/inovashon a wòrdu registrá na (Bureau Intellectuele Eigendommen – BIE) e asina yamá Ofisina di Propiedat Intelektual.

Riba e potrèt por mira sr. Dalnoot ku su registrashon den su man.

Ministerio konserní

Bo opinion