Notisia

Kompanianan di Gobièrnu a firma MoU ku GZE

Geplaatst op 4 Òktober 2017 dor di Ministerio di Desaroyo Ekonómiko

Willemstad- Djamars 3 di òktober tabata kulminashon di un seri di firmamentu di MoU entre kompanianan anónimo di Gobièrnu di Kòrsou i Guangdong Zhenrong Energy Co. Ltd./ China Zhenrong Holding Limited.

 

Manera ta konosí, Gobièrnu di Kòrsou, representá dor di Promé Minister, señor Eugène Rhuggenaath, huntu ku direktor di Refineria di Kòrsou N.V., señor José van den Wall-Arnemann, i representante di Guangdong Zhenrong Energy Co. Ltd i China Zhenrong Holding Limited, señor Bingyan Chen a firma e asina yamá “Addendum” riba e “Heads of Agreement” dia 19 di novèmber 2016 resientemente. Awor a toka turno na diferente kompania anónimo di Gobièrnu di Kòrsou pa firma nan MoU den presensia di nan respektivo ministernan. E seremonia di firmamentu a tuma lugá den presensia di Minister pa Desaroyo Ekonómiko, señor Steven Martina, i Minister di Salubridat, Medio Ambiente i Naturalesa, señora Suzanne Camelia-Römer.

Ku firmamentu di e MoU nan aki, Kòrsou a realisá un paso importante den e proseso pa realisá kooperashon di un banda, i di otro banda establesé e prinsipionan básiko pa inisiá negosiashon entre kompanianan anónimo di Gobièrnu i e operador nobo di e refineria. Ta premirá ku e operador aki ta bira Guangdong Zhenrong Energy Co., Ltd.

E kompanianan di gobièrnu envolví (CDM Holding, CPA/KTK, Curoil, Aqualectra i Selikor), ku tin un relashon estrecho ku refineria a ekspresá nan intenshon pa medio di e MoU nan firmá, pa eksplorá posibel koperashon pa mantené nan relashon aktual ku e refineria. Kaminda por lo mehorá e relashon aki dor di, entre otro, eksplorá merkadonan nobo, ekspandé aktividat eksistente òf introdusí aktividatnan nobo ku por eksportá den Karibe i Latino Amérika.

Teniendo kuenta ku e relashon ekonómiko eksistente ku Repúblika di China tin ku Karibe i Merka i tambe den kuadro di e “One Belt One Road Initiative”, e ophetivo ta pa Kòrsou por kapitalisá riba e presensia di Guangdong Zhenrong Energy Co. Ltd. aki na Kòrsou. Alabes ta e intenshon pa Kòrsou buska posibilidatnan pa uni forsa, ku e meta pa duna kontenido na e nesesidatnan di otro, pa asina realisá un desaroyo duradero di e paisnan (Kòrsou i China).

Kòrsou a logra un paso mas serka di su ophetivo pa krea tin aktividatnan ekonómiko duradero.

Ministerio konserní

Bo opinion