Notisia

Konferensha “Resilient Infrastructure” 8 i 9 di mei 2018

Geplaatst op 2 Mei 2018 dor di Ministerio di Tráfiko, Transporte i Planifikashon Urbano

Ku ekspertonan di Universidat di Okford, UNOPS, i representantenan di Gobièrnu di Kòrsou i di Gobièrnunan di paisnan karibense.

 

Willemstad – E “Intergovernmental Panel on Climate Change” (IPCC) di Nashonnan Uni ta indiká ku Karibe lo eksperensiá mas i mas kondishonnan di wer ekstremo den futuro serkano. Pa islanan ABC (Aruba, Boneiru i Kòrsou) ta spera un subida den temperatura di bientu, un bahada den áwaseru, un subida den intensidat di orkan, i un subida di e nivel di laman.

 

Pa e motibunan aki, e konferensha internashonal “Resilient Infrastructure” ta trata e invershonnan basá riba evidensia, i maneho den infrastruktura nashonal ku lo por usa pa sostené desaroyo resistente i duradero kontra riesgonan.

 

United Nations Office for Project Services (UNOPS) ta traha huntu ku Gobièrnu di Kòrsou pa logra e ophetivo di adaptá maneho di infrastruktura aktual pa nos infrastruktura por ta mas resistente kontra diferente kambionan den futuro na Kòrsou i den nos region. Esaki ta inkluí e efektonan di kambio di klima i un ekonomia ku ta dependé ménos di kombustibel.

 

‘Nos infrastruktura ta di vital importansia pa Kòrsou por funshoná i pa su éksito den futuro. Pa e motibu aki, e mester ta optimalisá, efektivo i resistente. Den e konteksto aki, planifikashon riba un tèrmino largu, i kual ta inkluí diferente sektor, ta esensial pa maksimalisá e potensial di nos isla na benefisio di nos komunidat.’ segun Minister Zita Jesus-Leito di Ministerio di Tráfiko, Transporte i Planifikashon Urbano.

 

Kòrsou ta kana dilanti den Karibe pa loke ta planifikashon di infrastruktura

Ministerio di Tráfiko, Transporte i Planifikashon Urbano di Kòrsou i UNOPS a traha ku gruponan di interes na Kòrsou for di 2016 pa desaroyá e “Evidence Based Infrastructure  (EBI) approach”, esta e modelo nashonal di infrastruktura (“National Infrastructure model”). Esaki ta parti di e inisiativa di UNOPS huntu ku diferente Universidat di Inglatera, enkabesá pa Universidat di Oxford (ITRC-MISTRAL), pa sostené paisnan den toma di desishon a base di evidensia i asina hasi e infrastruktura mas resistente kontra kambionan i retonan den futuro, entre otro kambio di klima. Komo esun promé den region di Karibe, e modelo ta un komponente úniko ku ta hasi uso di asina yama “open-source software” pa simulá e futuro di sistemanan nashonal di infrastruktura den diferente sektor.

 

A hasi uso di e promé resultadonan di e modelo pa desaroyá un komprondementu di Kòrsou su nesesidat aktual, i di den futuro, pa loke ta infrastruktura i kon por supli esakinan. A analisá sektornan di infrastruktura manera maneho di awa i awa sushi, energia, i sushi pa determiná retonan prinsipal riba tèrmino largu. A analisá e riesgo di subida di nivel di laman i inundashon riba e kareteranan i na edifisionan esensial, manera di salubridat i edukashon kousá pa un tormenta. Komo e promé paso den implementashon di e “EBI framework”, e modelo tin e potensial pa sigui sostené toma di desishon pa loke ta infrastruktura na Kòrsou kual por tin un efekto positivo riba Kòrsou su ekonomia, medio ambiente, i sosiedat en general.

 

Konferensha “Resilient Infrastructure” 8 i 9 di mei 2018

Durante di e konferensha “Resilient Infrastructure” den mei lo presentá e promé resultadonan. Delegashonnan di diferente pais di Karibe Hulandes i Ingles ta partisipá na e evento. Ekspertonan di e Instituto di Kambio di Medio Ambiente di Universidat di Oxford i di Universidat di Southhampton tambe ta partisipá.

 

Riba e promé dia, Gobièrnu di Kòrsou ta habri e konferensha ofisialmente. Gobièrnu di Kòrsou huntu ku UNOPS lo presentá e resultadonan, rekomendashonnan, “best practices”, i dato a base di evidensia di e análisis asina yama “EBI fast track” i modelonan pa planifikashon di infrastruktura riba tèrmino largu.

 

Riba e di dos dia, tin diferente grupo di trabou pa trata “best practices” i módulonan ku lo refiná e posibilidatnan pa garantisá éksito riba un tèrmino largu di e “evidence based approach”. Durante di e gruponan, aki ta trata tambe e invershonnan, basá riba evidensia, i maneho den infrastruktura nashonal ku lo por usa pa sostené desaroyo duradero i resistente kontra riesgonan manera subida di nivel di laman i kaida fuerte di áwaseru. Banda di tur esaki, e konferensha ta sirbi tambe komo un foro pa konsiderashon i diskushon habrí riba e aspektonan mas agudo ku paisnan den region tin ku atendé kuné pa loke ta sosiedatnan resistente i infrastruktura.

Ministerio konserní

Bo opinion