Notisia

Konferensha: “The Ideal Curaçao Person”

Geplaatst op 20 Yüni 2019 dor di Ministerio di Enseñansa, Siensia, Kultura & Deporte

Willemstad - Awe Ministerio di Enseñansa, Siensia, Kultura & Deporte (E.S.K.D.) a tene e Konferensha: “The Ideal Curaçao Person”. Durante di e aktividat diferente orador a elaborá riba e tema kaminda nan a trese nan punto di bista for di diferente perspektiva pa ku e persona ideal pa pais Kòrsou.

Moderador Sr. Sergio Everon a introdusí Minister di E.S.K.D. sra. Marilyn Alcalá-Wallé ku a elaborá for di su perspektiva i enfatisá e urgensia pa konhuntamenta dal e promé pasonan pa traha riba e hende ku nos ke pa mayan. Den su desertashon Minister a kompartí e deklarashon di CARICOM na 1997 ku ta deskribí e puntonan di salida pa e hende ideal di Karibe. Alabes Minister a lansa 2 pregunta esensial pa ku e tópiko: “Kua ta e karakteristika i abilidatnan ku nos ke pa nos muchanan tin? “ i “Ken ta e persona ideal ku Curaçao mester pa futuro?”

E promé orador; Sr. Keith Carlo, a profundisá for di e perspektiva di defensor di mucha riba e tema di derechi di mucha i tambe a kompartí vários punto di salida ku ta duna kuminda pa pensamentu. For di e perspektiva di trahadó sosial orador sr. Ruckly Ettienne a suprayá kon importante ta pa tene kuenta ku nesesidatnan básiko den formashon di nos muchanan, tantu na skol, kas komo den nan ambiente sosial pa asina kontribuí na personanan sano i balansá pa awor i den futuro. Despues a sigui otro orador ku ta un profeshonal di den enseñansa pa ya 40 aña ku ta sra. Jeannette King, kende a trese e parti di inovashon digital di den enseñansa dilanti. Su presentashon a mustra e públiko kon pa medio di desaroyonan teknológiko hopi avansá i organisashon no tradishonal pero inovativo i kreativo di aulanan den skol por krea kondishonnan atraktivo pa muchanan konektá ku skol i eksperensiá siñamentu komo algu hopi agradabel.  Orador Reverendo Pastor Curtis Meris a elaborá for di e perspektiva spiritual kaminda ela trese dilanti diferente proposishon pa prinsipionan ku ta di gran balor pa tene kuenta kuné na momentu ku ta bai deskribí e persona ideal. E punto di salida finansiero ekonómiko a keda presentá pa sr. Bryan Irasquin den representashon di Kamará di Komèrsio kaminda ela mustra riba e parti kon nos mester invertí den e hende pa e por ta mas produktivo pa ku desaroyo ekonómiko.

E públiko tambe a sa di duna nan aporte i kontribushon na e konferensha den forma di dialogá na mesa ku otro den grupo i pone riba papel tur nan puntonan importante ku e hende ideal pa pais Kòrsou mester kumpli kuné. Huntu e públiko a forma un figura di hende na muraya ku ta konsistí di tur e karakterístika- i abilidatnan ku nan a formulá riba papel. Di e manera aki simbólikamente a pone e fundeshi pa e hende ideal pa pais Kòrsou. E konferensha aki lo keda dokumentá ku tur e diskurso i puntonan menshoná pa asina ilustrá kon e hende ideal di Kòrsou lo mester ta.

E konferensha a konta ku un públiko grandi di mas ku 100 persona i ku representantenan di vários organisashon manera, Konseho di Iglesia, Organisashonnan ku ta traha ku Hóbennan, Organisashonnan no-gubernamental, Kamará di Komersio, Konseheronan di minister, Parlamentarionan i hopi mas.

Por mira bèk riba un konferensha éksitoso i ku kontenido pa formashon di nos nashon.

************************************************

Ministerio konserní

Bo opinion