Notisia

Kòrsou por prepará miho pa kalamidat pa medio di Risicoprofiel i Mapa di Riesgo

Geplaatst op 15 Ougùstùs 2018

Willemstad – Figurá bo un eksploshon den un bario di Kòrsou. Inmediatamente mester sa kuantu hende ta biba einan, si tin skol òf kantor den bisindario. Tambe unda ta hiba e hendenan pa nan no kore peliger. P’esei Direktorado di Riesgo a laga traha un asina yamá ‘Risicoprofiel’ i un ʹMapa di Riesgoʹ pa Kòrsou. E ‘Risicoprofiel’ ta un dokumento den kual a inventarisá diferente kalamidat i krisis ku por sosodé na  Kòrsou. A midi kiko por ta e impakto di e kalamidat i ki konsekuensia e por tin. Asin’ei kada servisio i organisashon ku ta enkargá ku asistensia durante kalamidat, por mira bon kla kiko tin ku traha riba dje pa den future por anda adekuá ora di un kalamidat.

Na e presentashon di e ‘Risicoprofiel’ na prensa di Kòrsou, Promé Minister Eugene Rhuggenaath a mustra riba e echo ku riesgo por afektá bienestar general. Por ehèmpel St.Maarten ainda ta rekuperá di orkannan Irma i Maria di aña pasá. Dor di enfatisá e lema ‘Si bo sa, bo ta prepará’, Promé Minister Rhuggenaath a mustra kon por ehèmpel preparashon pa por a dil ku e riesgo, a yuda Kòrsou den suministro di kombustibel, ora esaki a stanka dor di situashon politiko eksterno.

Durante presentashon di e ‘Risicoprofiel’, direktor di Direktorado di Riesgo, Lesley Fer, a mustra riba 32 área di atenshon pa loke ta trata riesgo na Kòrsou. Esakinan ta varia di awa seru fuerte, kandela den Punda te ku imigrashon di gruponan grandi ku ta buska refugio. E riesgonan pa Kòrsou ta kategorisá den kuater koló ku ta varia di blou, ku ta ménos riesgo, bai hel, oraño te kòrá. Importante di e ‘Risicoprofiel’ ta ku konosementu di kiko por menasá nos komo komunidat i nos interesnan, kompará ku kon grandi e posibilidat i e impakto riba nos ta, ta yuda Gobièrnu pa traha mas dirigí  i efisiente pa protehá bida, mitigá daño personal i material i salbaguardiá interesnan vital di Kòrsou.

Denice Lobo Pieters di e Direktorado di Riesgo a presentá e Mapa di Riesgo pa Kòrsou ku ta traha den kolaborashon di e diferente organisashonnan den Rampenbestrijdings Organisatie, RbO. Riba e mapa aki por mira hopi lihé unda entre otro tin skol, kantor i kuantu kas. E ta yuda pa ora tin un kalamidat, pa den un fregá di wowo tur instansia enbolbí, por ehèmpel polis, brantwer i ambulans, por haña tur informashon nesesario den e área afektá. E ‘Risicoprofiel’ i Mapa di Riesgo ta válido te 2022. 

Bo opinion