Notisia

Kòrsou Presidente di OCTA

Geplaatst op 12 Mart 2019 dor di Ministerio di Asuntunan General i Promé Minister

Willemstad - Den siman di 25 di febrüari último Minister di Tráfiko, Transporte i Planifikashon Urbano, Sra. Zita Jesus-Leito huntu ku dos miembro di delegashon (ku Union Oropeo ta spònser) a biaha pa Polinesia Franses en konekshon ku e Siman Ministerial di OCTA. Durante e siman aki a trata diferente tema manera Fondo di Desaroyo Oropeo (Europees Ontwikkelingsfonds, EOF), desaroyo manera Brexit i e situashon na Venezuela. Minister Jesus-Leito a bai na lugá di Promé Minister Rhuggenaath, ya ku Promé Minister Rhuggenaath mester a keda pa atendé desaroyonan na Kòrsou.

Pa loke ta trata e fondo di desaroyo regional, na òktober 2018 ya a skohe definitivamente pa e tres sektor di foko pa region Karibe, esta: ‘resilience’, biodiversidat marina i energia duradero. Minister a firma un ‘endorsement declaration’ na nòmber di Kòrsou. En total e region Karibe ta haña 40 mion euro pa proyektonan komun den e region. Na mes un momentu Kòrsou a haña oportunidat pa presentá e situashon pa loke ta trata e di dies i diesun EOF. Ku e di dies EOF ta finansiá proyektonan pa drecha Kortijn, Nieuw Nederland, Sapaté i Tera Cora. Lo aloká e fondonan pa e di diesun EOF na proyektonan pa konstruí komunidatnan duradero  i ‘resilient.

Durante e Konferensia Ministerial, Kòrsou a papia tokante di su vishon pa loke ta trata diferente desaroyo manera Brexit i e desaroyonan aktual ku tin influensia riba e fondo ku e ta risibí kaba. Ademas, a skohe Kòrsou unánimamente komo presidente di Overseas Countries and Territories Association (OCTA).

Despues di e Konferensia Ministerial a sigui e Foro EU-LGO den kual e LGO-nan huntu ku e miembronan di Komishon Oropeo, inkluyendo Euro Komisario Mimica, i nashonnan miembro (Dinamarka, Fransia, Gran Bretania i Reino Hulandes) a partisipá. Na nòmber di e LGO-nan Hulandes, Kòrsou a duna su disertashon tokante futuro di e ‘partnership’ di EU-LOG. Despues a presentá Kòrsou komo presidente di OCTA.

Durante kombersashonnan bilateral i multilateral ku Euro Komisario Mimica i otro miembro di Komishon Oropeo, a trata Venezuela. E komishon kier a haña informashon tokante di e situashon i durante e reunion el a indiká ku posiblemente tin fondo disponibel pa Kòrsou en konekshon ku e situashon na Venezuela. Gobièrnu i e Komishon lo tene mas kontakto ku otro riba esaki.

Ministerio konserní

Bo opinion