Notisia

Kòrsou riba Google Street View

Geplaatst op 10 Desèmber 2018 dor di Ministerio di Asuntunan General i Promé Minister

WILLEMSTAD- 10 di desèmber 2018 – 

Awor ta posibel pa eksplorá Kòrsou su kayanan i sitionan mas karakterístiko, manera brùg di ponton, Handelskade i Kenepa Chikitu, riba Google Street View. Esei ke men ku a bira mas fásil pa transitá riba nos isla i haña e negoshi ku bo ta buskando. Esaki a bira posibel despues ku na òktober 2017, Promé Minister Eugene Rhuggenaath, huntu ku Minister di Desaroyo Ekonómiko Dr. Steven Martina, Minister di Tráfiko, Transporte i Planifikashon Urbano sra. Zita Jesus-Leito, i e partnernan Dolfijn FM, Ofisina di Turismo di Kòrsou (CTB), CHATA, Bureau Telecommunicatie & Post, UTS i Profound Projects a lansa e proyekto ‘Curaçao on the Map’ (‘Kòrsou Riba Mapa’). 

Google a kolaborá ku CTB i e partnernan ariba menshoná pa generá imáhen di 360 grado pa Street View, i pronto nan lo bira disponibel via Google Maps i riba e app Google Street View. Tambe tin un kantidat di panorama di 360 grado di e lugánan mas bunita na Kòrsou, manera Kenepa Grandi, Playa Grandi i hopi mas, generá ku Street View Trekker (un ekipo ku bo por bisti manera un ‘rugtas’, ku un sistema di kámara riba dje). 

Entre tantu, diferente negoshi na Kòrsou a traha duru riba nan transformashon digital i a agregá kantidat di informashon útil na Google Maps via Google My Business, di manera ku awor ta muchu mas fásil pa un kliente haña lista di negoshi, orario, foto i opinion di otro kliente.   

Magdalena Filak, Program Manager di Google Street View Special Collects ta komentá lo siguiente: “Di nos parti ta un plaser di por pone Kòrsou riba Google Street View. Nos a ripará ku tin hopi demanda pa Street View di parti di hende individual i negoshi riba e isla, i nos ta kontentu di por yuda tantu e hábitantenan di Kòrsou mes komo e hopi turistanan ku ta deseá di eksplorá e isla.” 

Sigun Promé Minister Eugene Rhuggenaath, ta danki na Google Street View ku awor nos por tin un idea di totalidat di komunidat di Kòrsou. Pues, dor di duna un bista total di kaya i sitionan di Kòrsou, Google Street View ta aportá na kreashon di e sintimentu  serka nos hendenan di ta konektá ku otro i tambe ta pone nos realisá loke ta hasi nos isla úniko.

Den transkurso di e próksimo dianan, Kòrsou lo subi riba Google Street View. Street View ta disponibel via Google Maps riba internèt, Android i iOS.   

Ministerio konserní

Bo opinion