Notisia

Kòrsou ta anfitrion di e di 41 seshon di ‘RA IV Hurricane Committee’

Geplaatst op 27 Febrüari 2019 dor di Ministerio di Tráfiko, Transporte i Planifikashon Urbano

Willemstad – Minister Jesus-Leito huntu ku Servisio Meteorológiko Kòrsou ta anunsiá ku Kòrsou lo ta anfitrion e aña aki di e di 41 seshon di e ‘RA IV Hurricane Committee’ di e Organisashon Meteorológiko Mundial (OMM). Esaki ta tuma lugá na Sta. Barbara Beach & Golf Resort for di dia 18 te ku 22 di mart 2019.

OMM ta un agensia speshalisá di Nashonnan Uni ku miembresia di 192 nashon i teritorio. El a originá for di e ‘International Meteorological Organization’ (IMO), ku a inisiá ku e kongreso na 1873 konosí komo ‘Vienna International Meteorological Congress’. OMM a keda establesé dia 23 di mart 1950 komo un agensia pa atendé ku meteorologia, hidrologia operashonal i aplikashonnan riba entre otro tereno di aviashon, nabegashon marítimo, agrikultura relashoná ku esakinan. Mirando ku Kòrsou tabata representá na e reunion di direktornan na Washington di 1947, por konsiderá Kòrsou komo un di e fundador di OMM. E sekretariado, situá na Geneva, tin e sekretario general na kabes.

Na aña 1977 OMM a establesé e ‘Hurricane Committee’ pa e region di Nort, Sentro Amérika i Karibe ku e propósito pa establesé sistemanan di kordinashon regional i nashonal pa sigurá ku ta redusí pèrdida di bida i propiedat, kousa dor di orkan, te na un mínimo.

Tin 27 pais miembro, esta Antigua & Barbuda, Bahamas, Barbados, Belize, British Caribbean Territories, Canada, Colombia, Costa Rica, Cuba, Curaçao, Sint Maarten, Dominica, Republika Dominikana, El Salvador, Fransia, Guatemala, Haiti, Hondúras, Jamaica, Mexico, Hulanda, Nicaragua, Panamá, St. Lucia, Trinidad and Tobago, UK, USA , i Venezuela.

For di 18 te ku 22 di mart 2019 representantenan di e paisnan menshoná lo ta na Kòrsou pa e kongreso ku tin un agènda detayá den kual lo trata plannan operashonal i di koordinashon, i palabrá diferente aspekto. Kada aña e miembronan aki ta bini huntu pa evaluá e temporada di orkan di e aña anterior i prepará pa esun di e aña aktual. Mayoria gastu relashoná ku esaki ta keda kubrí pa e organisashonnan internashonal.

Na 2018, e reunion aki a tuma lugá na Martinique. Riba e potrèt, por tuma nota di e delegashon ku a partisipá na esaki.

Ministerio konserní

Bo opinion