Notisia

Kòrsou ta anfitrion di seshonnan internashonal di AICESIS 2019.

Geplaatst op 27 Febrüari 2019 dor di Ministerio di Desaroyo Ekonómiko

Willemstad – Dianan 7 i 8 di mart próksimo e Asosiashon Internashonal di Konsehonan Ekonómiko i Sosial i Institutonan Similar (AICESIS) lo tene su reunion anual di direktiva na Kòrsou. Konseho Ekonómiko i Sosial di Kòrsou (SER) lo ta anfitrion di e evento importante aki, siendo un miembro di direktiva di e asosiashon internashonal akí for di 2017 i representando asina ei region di Latino Amérika i di Karibe.

A base di e tema di e aña akí, kual ta “Revolushon digital i su impakto riba futuro di humanidat”, delegadonan di konsehonan ekonómiko i sosial di práktikamente tur region na mundo, lo bin Kòrsou pa dialogá i interkambiá di pensamentu i di bon práktika tokante e avanse teknológiko di e próksimo 20 aña i e diferente reto- i oportunidatnan ku esaki ta trese kuné.

E apertura ofisial di e evento lo tuma lugá dia 7 di mart kaminda Promé Minister Sr. Eugène Rhuggenaath lo tene un diskurso introduktorio pa e oudiensia internashonal. Despues di e reunion anual, ku ta aksesibel solamente pa e miembronan di direktiva di AICESIS, ta bai tin un tayer habrí den forma di diskushonnan di pènel pa tur miembro di AICESIS Dia 8 di mart. E tayer aki lo ser presensiá tambe pa opservadónan internashonal, regional i institutonan lokal ku a haña un invitashon spesial. Minister di Desaroyo Ekonómiko di Kòrsou, Sr. Kenneth Gijsbertha, lo hasi apertura ofisial di e tayer kaminda e lo elaborá riba e tópiko di ‘Smart Nation’.

E seshonnan internashonal di AICESIS 2019 lo tuma lugá na Renaissance Curaçao Resort & Casino. Pa mas informashon tokante e evento internashonal akí por bishitá e wèpsait di SER www.ser.cw òf tuma kontakto ku Sra. Lidia Rocha-Teixeira na 461-5328.

Ministerio konserní

Bo opinion