Notisia

Kòrsou ta partisipá na tayer den kuadro di prevenshon i preparashon di derame di zeta

Geplaatst op 18 Mart 2019 dor di Ministerio di Salubridat Públiko, Medio Ambiente i Naturalesa

Willemstad - Resientemente Kapitan di haf huntu ku Inspektor di haf i un empleado di Direktorado di Kontrol di Riesgo i Maneho pa Kalamidat (DRR), a partisipá na e “Sub-Regional Level II workshop on the Oil Pollution Response Convention (OPRC) and the Implementation of an Incident Management System” ku a tuma luga na St. Kitts. 
  
E tayer tabata organisá dor di International Maritime Organization (IMO), UNEP CAR/RCU (United Nations Environment Program - Regional Coordinating Unit for the Caribbean Environment Program), Rac/Rampeitc-Caribe (Regional Activity Centre/Regional Marine Pollution, Emergency, Information & Training Centre for Wider Caribbean) konhuntamente ku Gobièrnu di St. Kitts & Nevis. Ta tin partisipantenan di Anguila, Antigua, Aruba, Barbados, Bahamas, Belize, Kòrsou, Granada, Guyana, St. Lucia, St. Vincent, St. Kitts, Suriname i Trinidad. 
  
Ophetivonan di e kurso tabata pa entrená e partisipantenan ku e aspektonan táktiko di preparashon i  reakshon den kaso di un derame di zeta òf otro kímiko i tambe uso di un “incident management system” pa por kordiná limpiesa di un derame mas mihó posibel. 
  
Derame di zeta ta identifiká den e Profil di Riesgo di Kòrsou 2017-2022 komo un riesgo ku un probabilidat haltu i ku konsekuensia konsiderabel pa Kòrsou. Basá riba e Profil di Riesgo di Kòrsou, Gobièrnu ta dedikando atenshon mas spesífiko na prevenshon i preparashon pa e riesgonan identifiká. Esaki ku e meta pa logra limitá dañonan personal, material i di medio ambiente promé, durante i despues di kualkier krísis òf kalamidat ku por sosodé na Kòrsou. 
  
Teniendo e ariba menshoná na konsiderashon e konosementu atkerí na e tayer aki lo bai yuda Kòrsou yega konhuntamente ku e diferente “stakeholders” na su plan di emergensia pa derame di zeta (National Oil Spill Contigency Plan) mas pronto posibel. Tambe dor di hasi ehersisio, basá riba e plan aki, por guia un situashon di derame di zeta òf otro produktonan kímiko mihó. 


Riba foto di robes pa drechi: M. Richard, M. Laroche, D. Lobo-Pieters, F. Scheper, E. Taylor.

Ministerio konserní

Bo opinion