Notisia

Kòrsou ta prepará dòbel pa eventual kalamidat

Geplaatst op 12 Sèptèmber 2019 dor di Ministerio di Asuntunan General i Promé Minister

WILLEMSTAD - Tim di e Organisashon pa manehá kalamidat (Rampenbeheersingsorganisatie, RBo) ta partisipá na ehersisio internashonal Caribbean Coast Exercise. E ehersisio a ser organisá dor di United Nations Office for the Coordination of Humanitarian Affairs (OCHA) i e departamento di desaster di ‘European Union’.

RBo lo simulá dos senario di kalamidat e siman aki, komo entrenamentu di eventual kalamidat ku por sosodé na Kòrsou.

Riba djaweps 12 di sèptèmber i djabièrnè 13 di sèptèmber RBo i tur entidat ku ta representá den e organisashon ta riba pia, pa asina pasa dor di tur prosedura i akshon ku mester tuma ora berdat Kòrsou haña su mes konfrontá ku un eventual kalamidat.

Kada kalamidat tin su senarionan spesífiko ku mester apliká. E biaha aki ta ensayá dos di e posibel senarionan. Riba djaweps ta simulá un erupshon di vulkan na Saba, ku ta resultá den un tsunami. Den e simulashon Kòrsou lo kordiná e yudansa na Isla riba, i lo duna refugio na evakuadonan di Saba. Riba djabièrnè 13 sept. ta pasa dor di e senario di un orkan fuerte ku supuestamente ta pasa na Kòrsou. Ya kaba, segun proseduranan, Minister pa Asuntunan General ku konforme, GT Landsverordening Rampenbestrijding, ta Opperbevelhebber, a duna enkargo na kordinador nashonal di krisis i desaster i komandant di brandwer den su rol di lider operashonal, pa aktivá e miembronan di Rbo durante siman pa prepará pa e senario aki, manera tambe lo ta e kaso si bèrdat lo ta tin un orkan na kaminda.

E ensayamentunan menshoná tabata forma parti di unu grandi den e parti Karibense den Reino Hulandes, huntu ku mas partner ku den kuadro di lei (GT Landsverordening Rampenbestrijding i Plan di Kalamidat). Debí na e yudansa ku Defensa, na nomber di Reino, a bai duna na Bahamas, e entrenamentu no ta mes un grandi mas ku a plania adelanta. Pero dor di e parti importante ku Kòrsou lo a hunga den e plannan inisial, a disidí tòg pa sigui ku e senarionan, sikiera na Kòrsou.

Segun Direktorado di Kontròl di riesgo & maneho pa kalamidat (DRR), ku ta organisá e entrenamentu,  públiko no ta bai nota muchu di e entrenamentu. Ta trata mas bien di entrenamentu den forma di ʹdesktopʹ, kaminda ta wak kon lihé e diferente organisashon ta riba pia, kon lihé, spesífiko i adekua ta duna i sigui òrden, unda por tin fayo òf reto den e proseduranan eksistente i kon ta reakshoná riba eventual suseso inesperá.

Na final di ehersisio RBo i tur organisashonnan ku a partisipá lo ser akreditá pa United Nations i ‘European Union’. E akreditashon aki ta un logro grandi pa nos organisashon di krisis i desaster ku ta demonstra di por kordina i maneha un krisis of desaster ku tuma luga aki na  Korsou, of fuera di Korsou. Algu ku ser demonstra kaba durante asisitensha na Sint Maarten despues di pasashi di orkaan Irma na september 2017.

Entrenamentu di senarionan di kalamidat ta nesesario pa Kòrsou su timnan di Kalamidat ta bon prepará. Hopi importante tambe ta pa públiko semper ta prepará tambe. Informashon di kon por hasi esaki mas mihó, ta riba website di Gobièrnu www.gobiernu.cw òf www.kalamidat.cw. Pero tambe por ‘download’ e app ‘Kalamidat’ grátis den ‘App Store’ of ‘Play Store’. Por abona tambe na e ‘whatsapp di kalamidat’ mandando un mensahe pa 519-1234 òf por like página di ‘Facebook’: RisicobeheersingCuracao.

 

 

Ministerio konserní

Bo opinion