Notisia

KUATER DAMA TA HAÑA SERTIFIKADO DI SOAW

Geplaatst op 1 Desèmber 2017 dor di Ministerio di Desaroyo Sosial, Labor i Bienestar

Willemstad – E ‘Commission on the status of women’, ku a tene na mart 2017 na New York, a enfatisá mashá e importansia di proyektonan ku ta yuda spesialmente hende muhé di 30 aña pariba a haña trabou atrobe. Ta trata di un kategoria di edat kaminda tareanan struktural di kuido i situashonnan personal di famia por okashoná un distansia grandi pa merkado laboral. Sektor di Labor di Ministerio di Desaroyo Sosial, Labor i Bienestar a hunga un papel den esaki via un proyekto piloto pa hende muhé di 30 aña pariba desempleá. Partner den e proyekto aki ta Fundashon Kuido Hubenil/Casa Manita.

Informashon a fondo
Fundashon ‘Meisjestehuis’ Curaçao o Casa Manita ta un di e organisashonnan di kuido ku a sali for di e Fundashon Kuido Hubenil, fundá na 1965. Na e Fundashon Kuido Hubenil ta pertenesé tambe Casa Cuna ‘Mercedes Winkel’ i Casa Cuna ‘Villa Maria’. E persona ku a tuma e inisiativa tabata Aura Winkel-Winkel kende huntu ku algun amiga a kuminsá ku e internat pa mucha muhé na Penstraat 55, den e edifisio ku awor ta konosí komo Hubentut 70. Na aña 1969 e internat a muda pa e direkshon aktual den e bario Amerikanenkamp, na Grenadiersweg 2. Nòmber di Casa Manita ta dediká na señora Winkel kende kariñosamente nan ta tabata yama Manita o sea ruman muhé chikitu.

Grupo di enfoke
Casa Manita ta un internat pa mucha muhé, prinsipalmente pa mucha muhé entre kuater (4) i dieskuater (14) aña, ku kapasidat pa sinkuenta (50) kliente. Pa motibunan práktiko, por ehèmpel pa tene ruman hòmber i ruman muhé serka otro, aktualmente ta kedando tambe algun mucha hòmber den e internat. Un estadia den e internat en prinsipio ta di índole temporal. Tur partner den e kadena enbolbí ta traha aktivamente pa mehorá e situashon na kas i limitá e riesgonan for di e espektativa ku e muchanan riba término por bai kas bèk bou di kondishonnan stabil i sigur.


Kolokamentu for di kas
Awendia e muchanan no ta keda koloká mas pa e mayornan, sino ta bai e internat riba indikashon di un di e partnernan di e kadena den kuido: GVI, Voogdijraad i Skuchami. E motibunan pa koloká un mucha o algun mucha di un famia ta di varios índole. Por trata di:

  • Motibunan di índole sosial ekonómiko, por ehèmpel e mayornan no tin medionan finansiero pa mantené e famia
  • Deskuido
  • Maluso seksual (serka mucha hòmber tambe, pero esei ta sosodé menos)
  • Maltrato físiko i mental (dor di tionan, rumannan hòmber, tata, padrasa, bisiña o amigo di e mama)
  • No tin kas (e famia ta en espera di un kas)

Deskripshon trayekto di siña i traha
Meskos ku mayoria instansia den kuido, Fundashon Kuido Hubenil tambe tin un falta di personal struktural. P’esei tin espasio pa ofresé kandidatonan serio ku afinidat pa kuido di mucha un trayekto di siña i traha. E tareanan lo no ta pedagógiko, sino tin mas di aber ku kuido fasilitario rondó di e muchanan. Por trata di ayudo den kushina, ayudo den limpiesa, peñamentu di e muchanan o yuda bisti paña, tene vigilansia ora ta traha tarea di kas o lesa, vigilansia ora ta hunga i tur trabounan di sosten ku tin na un internat o akogida di mucha. E partisipantenan lo ta bou di vigilansia di e direktor di Casa Manita, señora Haideline Lovert.

Metanan di e trayekto di siña i traha
a. Eksperensia di siña den kombinashon ku guia pa trabou pa hende muhé ku un distansia relativamente grandi pa merkado laboral den e kategoria di edat 30 aña pariba (relativamente mirá ta trata di e grupo di mas grandi di hende ku ta haña onderstant)
b. Engrandesé e propio imagen i e imagen personal di e partisipantenan na e trayekto di siña i traha
c. Konsientisashon di e grupo di enfoke tokante e problemátiko di kuido i e papel positivo ku nan por hunga pa hasi e bida di mucha hoben ku menos oportunidat mas plasentero.

Ministerio konserní

Bo opinion