Notisia

MANEHO DI GOBIÈRNU DI KÒRSOU TA PA AKSESO NA LAMAN PÚBLIKO TA LIBER

Geplaatst op 16 Ougùstùs 2018 dor di Ministerio di Tráfiko, Transporte i Planifikashon Urbano

Boaose

Willemstad – Gobièrnu di Kòrsou a tuma nota di e anunsio ku lo bai manifestá djabièrnè awor na  ‘Baoase Resort’. Gobièrnu ta informá komunidat di Kòrsou ku nos no tin ningun opheshon pa ku manifestashon tanten ku hasi esaki konforme regla vigente den nos pais.

Gobièrnu ta e órgano responsabel pa maneho i mantenshon di órden públiko di pais. Ta su tarea pa atendé ku esnan ku no ta kumpli ku normanan stipulá den e maneho, kual ta basa riba leinan eksistente.

Kada instansia òf habitante tin derecho riba tratamentu di su kaso ku e koutela nesesario i gobièrnu mester atendé esaki konforme prinsipionan di bon gobernashon.

Aunke no ta usual pa bai den kaso spesífiko, ta hasi esaki awor pa por trese mas klaridat. Pa loke ta trata e kaso spesífiko di ‘Baoase Resort’, nos ke informá ku Minister di Tráfiko, Transporte i Planifikashon Urbano den su maneho ta hasi lo máksimo pa duna tur hende akseso na tur loke ta di pueblo di Kòrsou manera nos playanan i laman.  Den e kaso ya menshoná, Minister ta den e fase di finalisashon pa loke ta e palabrashon i un parti di e konstrukshonnan ku a tuma lugá na e sitio spesífiko aki.

E hotèl aki, ta empleá mas di 90 hende lokal i meskos ku otro empresa a sigui desaroyá i krese su produkto. Despues di a hiba kombersashonnan amplio ku e desaroyadó i ku Ministernan mes di turno a bai i tuma nota di e situashon na e área. Ekspertonan a hasi análisisnan nesesario pa por tuma e desishon kon lo mester kaba di atendé ku e promé fase di e proyekto ku a yega su fin. 

Gobièrnu mester di espasio pa e por traha, pa por regla tur e rekisitonan di e kaso aki i tambe ku diferente aspekto ku lo por garantisá e transparensia i konsistensia nesesario den futuro. Aspektonan ku nos ta wak den e kasonan aki ta akseso liber na kosta pa siudadano i tambe desaroyo di lamannan públiko pa nos abitantenan.

Nos ta trahando riba un nota di maneho pa ku akseso na laman en general.  Den esaki nos lo tene kuenta tambe ku desaroyonan eksistente rònt nos isla i e aspekto di kambio di klima  ku ta influensia nos kosta.

Ministerio konserní

Bo opinion