Notisia

MEO den estrecho koperashon ku ministerio di BPD ta anunsiá: Inisio di kampaña ‘Turi’ dirigí riba registrashon di tur alohamentu

Geplaatst op 22 Ougùstùs 2019 dor di Ministerio di Desaroyo Ekonómiko

WILLEMSTAD - Entrante aña 2020 Gobièrnu di Kòrsou lo introdusí un kambio den e lei ku ta rekarda registrashon di alohamentu alternativo na Kòrsou. Lokual ta nifiká ku esaki lo hasi registrashon pa tur doño di alohamentu algu obligatorio. Premirando riba e kambio di lei aki, Ministerio di Desaroyo Ekonómiko(MEO) den estrecho koperashon ku ministerio di Maneho di Gobernashon, Planifikashon i Servisio Públiko (BPD) a lansa un proyekto piloto ku ta karga e nòmber ‘Turi’ ku e meta pa informá komunidat i habri oportunidat pa esnan konserní kuminsá registrá for di awor.

 

‘Turi’ ta simbolisá nos sektor turístiko; varia, vibrante i kolorido, yen di oportunidat pa sigui desaroyá i krese aun mas. E proyekto piloto aki aparte di ministerionan MEO i BPD ta konta tambe ku sosten i kolaborashon di partnernan manera CHATA i CTB.

‘Turi’ a nase a base di e nesesidat den e sektor pa por yega na un mihó bista general di e kantidat i kalidat di kambernan ku nos isla tin pa ofresé na turistanan.

Pa por logra esaki, a habri e oportunidat for di 23 di ougùstùs awor te ku desèmber di e aña aki pa tur persona ku ta doño di un alohamentu alternativo pasa i registrá esaki. Bou di alohamentu alternativo ta komprondé personanan ku ta doño di un (òf mas) hotèl pero tambe esnan ku ta hür un òf mas flèt, apartamento, bùngalo, bed & breakfast òf kamber(nan) individual ku turista.

Aparte di brinda un mihó bista kuantitativo i kualitativo di alohamento lokal e registrashon aki ta sirbi tambe pa krea un registro públiko mas inklusivo i tambe un banko di data ku lo kontribuí na entre otro formulashon di maneho pa e sektor i analisá ekonómiko di e sektor.

Pa registrá bo alohamentu durante e proyekto ‘Turi’ bo tin mester di e siguiente dokumentonan; un identifikashon bálido di e doño di e alohamentu, karta di apoderashon i identifikashon di e apoderado (si akaso e doño ta apoderá un otro persona pa hasi e registrashon), registro di Kámara di Komersio (no mas bieu ku 3 luna), komprobante di petishon pa un pèrmit di hotèl o alohamentu i petishon pa un pèrmit di establesimentu.
Registrashon por sosodé di djaluna pa djabièrnè entre 8or i 15or personalmente na Lokèt di Pèrmit situá na Saliña 127 (Pega ku Subway) òf por sigui e link di registrashon riba e wèpsait di Gobièrnu di Kòrsou (www.gobiernu.cw) bou di e tap di Lokèt di Pèrmit. Tambe tin posibilidat pa “download” i yena e formulario di registrashon for di e wèpsait di gobièrnu, print i yena esaki i mand’e huntu ku tur e dokumentonan ariba menshoná na registra-akomodashon@gobiernu.cw. Tur akomodashon ku keda registrá lo risibí un konfirmashon di Lokèt di Pèrmit ku e datonan ku a keda registrá.

Pa mas informashon tokante ‘Turi’ i registrashon di bo alohamentu por tuma kontakto libremente ku Lokèt di Pèrmit na 0800-1515 òf pasa personal durante oranan di ofisina.

Ministerio konserní

Bo opinion