Notisia

Meteo ta selebrá diferente logro

Geplaatst op 28 Novèmber 2018 dor di Ministerio di Tráfiko, Transporte i Planifikashon Urbano

meteo1

Willemstad - Dia 26 di novèmber último Servisio Meteorológiko di Kòrsou a selebrá diferente logro ku su empleadonan. E motibunan pa selebrashon tabata logro di estudio, añanan di servisio den Meteo i aña di bida. Minister di Tráfiko, Transporte i Planifikashon Urbano, sra. Zita Jesus-Leito, huntu ku direktor di Meteo sr. Albert Martis a hasi e entrega di e diferente sertifikadonan i rekonosementu na e empleadonan konserní.

Miéntras resientemente un kolega ku ta terminá su estudio ku éksito na Spaña ta djoin e tim di meteorólogo, kuater aspirante mas pa e funshon di ‘observator’ ku na luna di Yanüari a drenta servisio, tambe a pasa nan eksamen Basic Instruction Package for Meteorological Technicians ku éksito aki na Kòrsou.

E tarea di e ‘observator’ ta pa e sigui e desaroyo di wer tantu na tera komo den laira lokual ta hopi importante pa aviashon. Su opservashon ta duna e meteorólogo un bon bista riba e situashon di tempu pa e krea su pronóstiko. E kuater studiantenan a pasa e estudio di ‘observator’ bou di guia di senior meteorólogo sr. Alfred Capello. Pronto ta sigui e parti práktiko di e estudio. Entre nan tin un aspirante meteorólogo ku pronto ta bai profundisá su mes mas den e área di meteorologia tambe.

Adishonalmente shete kolega a finalisá e kurso Python Programming Fundamentals ouspisiá pa e Fakultat di Ingenieria di Universidat di Kòrsou dia 22 di novèmber último. Esaki ta un kurso speshalmente pa siña lesa imahennan digitalisá via un sistema outomatisá den e área di meteorologia.

Finalmente tres kolega huntu a selebrá 65 aña den servisio di Meteo i tres otro a selebrá aña di bida. Minister Zita Jesus-Leito ta satisfecho ku e forma ku Meteo ta desaroyá i ta spera mas logro i mas adelanto pa e servisio. Meteo tin mas desaroyo na kaminda pa duna komunidat kada dia mas i mihó servisio. Empleadonan mes a uni pa organisá e selebrashon aki ku a tuma lugá na aire liber, riba e parti di mas haltu di e edifisio.

Riba e potrètnan por tuma nota di tur ku a risibí un rekonosementu riba e dia huntu ku Minister Zita Jesus-Leito i direktor sr. Albert Martis. Tambe un potrèt di parti di e personal ku tabata presente.

Ministerio konserní

Bo opinion