Notisia

Minister Jesus-Leito ta otorgá CAP su ‘Aerodrome Certificate 2018’

Geplaatst op 1 Yüni 2018 dor di Ministerio di Tráfiko, Transporte i Planifikashon Urbano

Willemstad –  Curacao Airport Partners (CAP) eksitosamente  a pasa e oudit pa ku Aeropuerto Internashonal di Kòrsou hasí e aña aki pa Outoridat di Aviashon Sivil di Kòrsou (CCAA, Curacao Civil Aviation Authority). E sertifikashon ta un rekonosementu di e stándarnan di e Organisashon Internashonal di Aviashon Sivil (ICAO) pa loke ta operashon i seguridat di Aeropuerto. Durante un seremonia ofisial, Minister di Tráfiko, Transporte i Planifikashon Urbano, Zita Jesus Leito den presensia di ouditornan di CCAA i e tim operashonal di CAP, a hasi entrega di e Sertifikashon na e CEO di CAP sr. Ralph Blanchard, den oudiensia di inspektornan di CCAA i tim operashonal di CAP.

 

E inspektornan di CCAA a realisá e oudit riba aeropuerto internashonal di Kòrsou na luna di mart último. E oudit ta un inspekshon obligatorio di ICAO. E sertifikashon ta kubri aspekto manera entre otro proseduranan di seguridat operashonal, áreanan operashonal pa avionnan, áreanan pa stashoná avion, markeo di outopista, iluminashon, i e parti di atendé ku emergensha. Mirando e resultado positivo di e oudit i kumplimentu di parti di CAP, CCAA ta otorgá Aeropuerto Internashonal di Kòrsou e sertifikashon pa tres aña.

 

E proseso di sertifikashon

Mester bisa ku dia 31 yanüari 2017, CCAA a anunsiá e finalisashon di e proseso pa sertifikashon di Hato. CCAA a traha den un estrecho kooperashon ku CAP riba e proseso di sertifikashon pa un aña.

 

Na desèmber 2016 un tim di ouditoria a tene un kontròl di sertifikashon, manera rekerí pa ICAO su dokumento number 9774 pa garantisá e kumplimentu di e aeropuerto internashonal huntu ku ICAO i Kòrsou su reglamentu i normanan di referensia (desèmber 19 te kua 22).

 

Pa medio di e sertifikashon aki Kòrsou, a kumpli ku un ophetivo mas establesé dor di ICAO su 2014 ‘Port of Spain Declaration’. CCAA a realisá e kontròl obligatorio den mart 2018 i mirando e resultado positivo a sertifiká e aeropuerto pa 3 aña.

Ministerio konserní

Bo opinion