Notisia

Minister sra. Alcalá di bishita na Florida National University (FNU)

Geplaatst op 20 Mei 2019 dor di Ministerio di Enseñansa, Siensia, Kultura & Deporte

Willemstad- Resientemente Minister di Enseñansa, Siensia, Kultura i Deporte sra. Marilyn Alcalá-Wallé den kuadro di e trabounan pa duna nos studiantenan oportunidat pa studia den region na institutonan di kalidat i e empeño pa tene nan debe di estudio pagabel, a realisá un bishita na Florida National University (FNU), un universidat privá, na Hialeah, Florida. FNU ta un universidat akreditá pa Southern Association of Colleges and Schools (SACS). SACS ta un di e seis organisashonnan di akreditashon rekonosé pa e Departamentu di Edukashon di Estados Unidos i e Konseho di Akreditashon pa Enseñansa Avansá (the United States Department of Education and the Council for Higher Education Accreditation).

Diferente di nos studiantenan ta studia na e universidat aki i Minister Alcalá-Wallé a sinta huntu ku e inisiadó di e universidat aki sra. Dr. Maria Regueiro ku ta alabes CEO/Presidente di FNU, e dekano di e Campus sr. Guillermo Araya, diferente Coach, direktor di diferente divishon na e universidat i tres studiante di Kòrsou ku ta tres ruman Braafhart. Alabes presente tabata sra. Willemijn Kallenberg, di e Konsulado General di Asuntunan di Reino Hulandes na Miami i ela sostené Minister Alcalá-Wallé durante e enkuentro ku e delegashon di FNU.

E universidat aki ta brinda: Master Degree Programs, Bachelor Degree Programs i Associate Degree Programs. E no ta deskriminá den kolegiatura. Pues tur studiante sea lokal o internashonal ta paga mesun suma pa nan estudio. Banda di estudio na e lokalidat, e universidat ta ofresé e posibilidat pa studiamentu “on-line”. Banda di esaki e universidat ta traha riba nivel internashonal via di “Partnership” i ta interesá pa sera un akuerdo ku Kòrsou. Esaki ta un punto di akshon pa realisá proksimamente.

Minister Alcalá-Wallé a gradisí e delegashon di FNU pa nan disponibilidat i tambe e studiantenan di Kòrsou ku tabata presente.

 

***************************************************************

Ministerio konserní

Bo opinion