Notisia

Minister sra. M. Alcalá-Walle den representashon di Gobièrnu di Kòrsou na Colombia

Geplaatst op 24 Mart 2019 dor di Ministerio di Enseñansa, Siensia, Kultura & Deporte

Na su yegada na Riohacha Minister Marilyn Alcalá-Wallé a keda kalurosamente yama bonbiní dor di Gobernador di La Guajira sr. Wilson Rojas Vanegas. Riohacha, ofisialmente Distrito Espesial, Turístico i Kultural di Riohacha,​ ta un munisipio kolombiano i kapital di e departamentu di La Guajira. La Guajira, Riohacha, konosé e asina yamá Festival Francisco El Hombre ku ta e ekspreshon kultural musikal máksimo di vallenato i e desishon a kai pa internashonalis’é.

A toka pais Kòrsou komo e promé pais pa e festival aki ta dediká na dje, algu históriko mirando e lasonan familiar i di hermandat ku Kòrsou i Riohacha tini (mas di 60 fam di Riohacheronan ta prosedente di Kòrsou). Partisipashon di pais Kòrsou a keda dignamente representá durante di vários aktividat i reunion. E Gobernador di Riohacha a tene vários reunion huntu ku Alcalde di Riohacha i Minister Alcalá-Wallé, ku a representá gobièrnu di Kòrsou pa elaborá riba diferente tema tokante di Edukashon, Siensia, Kultura i Deporte. Alabes a tene elaborashon riba e tema di Ekonomia rural i Ekonomia Oraño/Ekonomia Naranja (potensial di e desarroyo di e industria kreativo a través di herensia kultural i kreativo manera arte visual i esénika, artesanía, diseño, investigashon, baile i músika)

Huntu a yega na palabrashon konkreto kaminda e Gobernador sr. Rojas Vanegas a firma un akuerdo ku Minister Alcalá-Wallé pa traha mas estrecho ku otro riba e terenonan di Enseñansa, Siensia, Kultura i Deporte.

Durante e aktividatnan di interkambio kultural nos pais a keda representá pa artistanan lokal, artesano, kulinario i tambe nos Kaha di òrgel a subi tarima internashonal den kuadro di aña di kaha di òrgel. Pa medio di esaki gobièrnu di Kòrsou ta gradisí inmensamente Curacao Tourist Board (CTB) i gobernashon di La Guajira pa a karga ku gran parti di e gastunan enbolbí pa di e manera aki nos representantenan por a representá Kòrsou dignamente na Riohacha.

--

KOMUNIKASHON

Ministerio di Enseñansa, Siensia, Kultura & Deporte

Ministerio konserní

Bo opinion