Notisia

Ministerio di Desaroyo Ekonómiko(MEO) i Ministerio di Desaroyo Soaial, Labor i Bienestar (SOAW) a sera un akuerdo di kolaborasho

Geplaatst op 20 Novèmber 2018 dor di Ministerio di Desaroyo Ekonómiko

WILLEMSTAD- Djamars dia 20 di novèmber Minister di Desaroyo Ekonómiko, Sr. Steven Martina huntu ku Ministerio di Desaroyo Ekonómiko (MEO) a firma un akuerdo di kolaborashon ku minister Hensley Koeiman di Ministerio di Desaroyo Sosial, Labor i Bienestar (SOAW) pa loke ta trata proyektonan konhunto entre ámbos ministerio. 

Resientemente tabata tin diferente proyekto ku tin relashon ku otro entre ministerio di Desaroyo Ekonómiko (MEO) i ministerio di Desaroyo Sosial, Labor i Bienestar (SOAW). Netamente pa e motibu aki a skohe pa ofisialisá e trabounan entre ámbos ministerio pa medio di un akuerdo di kolaborashon. Meta di e akuerdo aki ta, pa konkretisá e trabounan konhunto ku ya a bin ta tuma lugá entre e dos ministerionan i alabes promové mas kolaborashon entre MEO i SOAW den proyektonan ku tin di aber ku e vishonnan di ámbos ministerio. MEO su vishon ta dirigí riba stimulá mas hende den nos komunidat pa por bira empresarionan stabil i duradero i e vishon di SOAW ta enfoká riba invertí mas den kapital humano i stimulá e desaroyo di retnan sosial ku ta kontené individualnan i e fuentenan di asistensia ku lo por yuda e personanan aki pa mobilisá.
E echo ku e dos ministerionan ta uni forsa pa ku proyektonan konhunto lo mester resultá den muchu mas efisiensia pa ku e trabounan i e resultadonan ku ámbos ministerio ke mira for di kada proyekto i finansieramente tambe e kolaborashon lo ta benefisioso mirando ku gastunan di kada proyekto konhunto lo keda repartí entre e ministerionan.
Na e momentunan aki e kolaborashon aki ta trata spesífikamente e proyekto di ‘Ekonomia den nos mes Man’ i tambe establesimentu di un sentro di asistensia pa personanan desempleá pero ta e intenshon ku e akuerdo aki lo akapará tur proyektonan ku aspektonan sosial i ekonómiko ku lo por desaroyá den futuro den e ministerionan aki.

Ministerio konserní

Bo opinion