Notisia

Ministerio di SOAW ta entregá di e relato riba edukashon familiar

Geplaatst op 26 Aprel 2018 dor di Ministerio di Desaroyo Sosial, Labor i Bienestar

Willemstad – Den transkurso di aña 2017, a tuma lugá 10 debate tokante edukashon familiar den diferente bario na Kòrsou. Resultado di e debatenan aki a keda entregá dia 26 aprel 2018 na e 4 Ministernan ku tin aspektonan di e Derechinan di Mucha, manera proklamá pa Nashonnan Uní, bou di nan kartera. Esakinan ta Minister di Hustisia, Minister di Salubridat, Medioambiente i Naturalesa, Minister di Enseñansa, Kultura, Siensia i Deporte i Minister di Desaroyo Sosial, Labor i Bienestar.

Organisashon di e debate tabata un esfuerso konhunto di tur organisashon ku ta forma parti di e Plataforma di Edukashon Familiar ku a keda lantá na yüni 2017. E plataforma aki ta operá bou di ouspisio di Sektor Famia i Hubentut di Ministerio di SOAW. E plataforma ta konsistí di e siguiente organisashonnan: Departamentu Salú Hubenil (GMN) Fundashon Bos di Hubentut, Sentro pa Inovashon i Guia Edukashonal, Direktiva di Skolnan Katóliko, Reda Sosial, Rema Uní, Fundashon Nos Tei pa Otro, Sifma, Yave, Sentro Otti Fanyete (ántes Jeugd Centrale Curaçao), Ambulante Justitiële Jeugdzorg Curaçao, Gezins Voogdij Instelling, Perspektiva Sosten Integral/Skuchami, Plataforma Training crêches i Plataforma di Direktivanan di Skol.

E debatenan a tuma lugá den kuadro di un proseso pa Kòrsou yega na formulashon di un vishon kolektivo tokante edukashon familiar. Ku tur e informashon balioso ku Sektor di Famia i Hubentut di Ministerio di SOAW a risibí durante di e debatenan aki, a yega na formulashon di un konsepto pa e vishon aki i tambe a logra formulá un mishon i identifiká e balornan klave mará na edukashon familiar. Den un di dos ronda di debate, bou guia di sektor Famia i Hubentut a validá e vishon, mishon i balornan i a logra formulá un mishon ku ta konta spesífikamente pa mayornan. Durante e di dos ronda aki tambe a skucha mucha i hóbennan den diferente katergoria di edat: 8-12, 13-15 i 16-18 aña. Un konklushon importante ku a sali for di e seshonnan ta ku nos mucha- i hóbennan tin nesesidat pa pasa tempu ku nan i trata nan ku amor. Nan no ke pa nan mayornan pleita ku otro, grita, dal i papia mahos ku nan i ku otro.

Pa loke ta trata e vishon riba edukashon familiar, esaki a bira: ‘Siendo siudadanonan responsabel di Pais Kòrsou, mayornan ta karga e responsabilidat primario pa eduká nos mucha i hóbennan di forma konsiente. Formashon emoshonal, sosial i spiritual ta importante pa nos konstruí un futuro Kòrsou di siudadanonan felis, independiente i pará den nan sapatu.’

E mishon pa komunidat, mishon pa mayornan i balornan klave, lo keda presentá durante e di tres konferensia anual di Taskforce di Reino tokante Derechinan di Mucha. Durante e konferensha kada isla lo bai hasi uso di nan mishon pa formulá plannan di akshon konkreto pa duna realse na e vishon di edukashon familiar. E konferensia ta tuma lugá na Kòrsou dianan 14, 15 i 16 mei. Na e konferensia aki ta partisipá riba invitashon profesionalnan riba tereno di edukashon familiar i hóben i mandatarionan di tur e paísnan den Reino Hulandes.
Sektor Famia i Hubentut di Ministerio di SOAW kier gradisí tur organisashon i tur persona individual ku a kooperá pa por a yega na e rapòrt final aki i ta sigui komprometé pa traha den estrecho kolaborashon ku otro organisashonnan pa empoderá famianan.

Riba e kombinashon di foto por apresiá e momento kaminda miembronan di e Plataforma di edukashon familiar, representantenan di SOAW i algun mucha i hóben a hasi entrega di e dokumento na e kuater ministernan korespondiente.

Ministerio konserní

Bo opinion