Notisia

Ministerio OWCS ta duna klaridat tokante failnan públika riba retnan sosial

Geplaatst op 14 Mart 2019 dor di Ministerio di Enseñansa, Siensia, Kultura & Deporte

Willemstad – Relashoná ku e failnan ku resientemente a sali públikamente riba retnan sosial, Ministerio di Enseñansa, Siensia, Kultura i Deporte ta duna informashon pa trese klaridat riba e suseso ku a pasa.

Primeramente ta importante pa informá ku ta trata aki di tres fail diferente. Un di e fail nan ta enserá un akuerdo ku SBAB pa asistensia di un persona den gabinete di Minister den kuadro di aktualisashon di maneho di SSC. E di dos fail ta relashoná ku un eksperto ku mester a hasi un investigashon den kuadro di e unidat di Enseñansa Obligatorio. I e di tres fail ta trata finansas di Stichting Studiefinanciering. E tres failnan aki pues no tin nada di haber ku otro. Ta tres fail kompletamente separá.

Den kaso di tur tres fail por konfirmá ku kada un a kana konforme e proseduranan preskribí pa lei. Sinembargo, den kuadro di lei di protekshon di informashon di persona (Bescherming van persoonsgegevens) no por duna informashon di kontenido di e failnan aki. Konsekuentemente, Ministerio OWCS lo keda transparente i duna informashon te kaminda por, manera ta reglá den Landsverordening Openbaarheid van Bestuur (LOB), pero si teniendo kuenta ku tur kondishonnan di restrikshon.

Pa e kaso spesífiko ku a surgi, Ministerio OWCS a identifiká dos trayekto. Komo ministerio a entregá na promé lugá un petishon ofisial pa un investigashon hudisial tuma lugá. Un empleado públiko mester tene su mes na e kódigo di komportashon pa ehersé su funshon debidamente. Na momentu ku desviá di esaki, e tin konsekuensia pa e empleado públiko. Banda di esaki ta bai kuminsá ku un trayekto komunikativo di kódigo di komportashon (integridat/huramentashon), pa un bes mas hala atenshon di tur empleado públiko riba e reglanan di komportashon i lealtat pa ku nan dunadó di trabou.

Ministerio konserní

Bo opinion