Notisia

Ministerio SMN tin tur atenshon pa e problemátika ku Sargassum, ku ketu bai ta keda yega Kòrsou, ta okashoná

Geplaatst op 17 Mei 2019 dor di Ministerio di Salubridat Públiko, Medio Ambiente i Naturalesa

WILLEMSTAD – Ministerio di Salú, Medio Ambiente i Naturalesa (SMN) a tuma nota di presensia di Sargassum awor na nos kosta sùit tambe. Komo ku na e parti aki di Kòrsou tin diferente área i lokalidat turístiko, Ministerio SMN lo keda monitoriá e situashon hopi di aserka. For di aña pasá nos ta eksperensiando kantidatnan rekòrt di Sargassum ku ta drif yega nos isla. Sargassum ta un fenómeno natural ku ta difísil pa kombatí i ku último añanan a mustra ku ta rekerí un atendementu di forma struktural. Ministerio ta hasiendo su máksimo esfuerso, apesar di su rekursonan limitá, pa limpia e áreanan ku ta mas vulnerabel mas pronto posibel. Den e kuadro aki a desaroyá un “draaiboek” pa ora Sargassum presentá na nos kosta. Ministerio ta hasiendo prueba tambe ku e Sargassum pa por aplik’é den agrikultura.

Aña pasá a kuminsá saka e promé kantidatnan di Sarsassum ku a yega Kòrsou for di algun boka pero durante e trabounan por a tuma nota ku mas i mas Sargassum ta yegando Kòrsou. Esaki a hasi atendementu ku e situashon hopi difísil pasobra mester realisá ku:

  1. no por evitá ku Sargassum ta yega Kòrsou,
  2. hende no por permanesé pa largu tempu den Sargassum sin protekshon,
  3. kostonan pa kombatí kantidat grandi di Sargassum ta sumamente haltu,
  4. hasta mester a wanta un ratu ku e trabou pasobra e la bira inútil.

Entretantu Ministerio di SMN ta sigui ku su trabou pa formalisá palabrashonnan i kontrato ku e kontratista ku a duna e mihó oferta, pa por atendé i “ruim op” mas ku ta posibel pa asina por kuminsá ku limpiesa di sierto área.

Ministerio SMN lo traha mas estrecho ku organisashonnan di boluntario ku ta dediká na naturalesa pa asina huntu trata na yega na un atendementu struktural i aseptabel pa e problema ku Sargassum ta kousa.

Ta bon sinembargo pa nos realisá e embergadura di e problema ku ta asotá islanan rònt Karibe inkluso Kòrsou. Mayoria isla den Karibe tin problema serio ku e kantidat grandi di Sargassum ku ta yega kosta. Riba internèt por lesa diferente artíkulo ku ta informá ku na algun isla manera Antigua i Barbados, e problema ta asina grandi ku hasta diferente lokalidat turístiko mester sera nan portanan pa algun luna pa motibu di presensia kuantioso di Sargassum. Ya tin hopi aña ku ta señalá Sargassum aki na Kòrsou, pero nunka den kantidat asina grandi manera aworakí ta e kaso. Ministerio SMN lo sigui hasi su máksimo esfuerso pa por atendé mas mihó posibel ku Sargassum.

Ministerio konserní

Bo opinion