Notisia

MISHON DI INVESTIGASHON “FACTFINDING” TA KREA SUFISIENTE PUNTONAN DI SALIDA PA UN MIHÓ KOPERASHON.

Geplaatst op 19 Mei 2019 dor di Ministerio di Tráfiko, Transporte i Planifikashon Urbano

MISHON DI INVESTIGASHON “FACTFINDING” TA KREA SUFISIENTE PUNTONAN DI SALIDA PA UN MIHÓ KOPERASHON.

Willemstad – Minister Zita Jesus-Leito ta sumamente kontentu ku e bishita eksitoso di  e organisashon ‘Toegepast-Natuurwetenschappelijk Onderzoek’ (TNO) ku a bini Kòrsou pa un mishon di investigashon di tres dia. Esaki ta relashoná ku e MoU ku a keda firma últimamente entre Gobièrnu di Kòrsou i instituto di investigashon TNO.

Minister Zita Jesus-Leito a inisiá e promé dia di e mishon ku un kaluroso bon bini na e delegashon. Durante e promé enkuentro Minister Jesus-Leito a  enfatisá e importansha di e bishita na e delegashon, kual ta ku Pais Kòrsou ta buska solushon pa problemanan tokante di transishon na energia duradero, planifikashon di espasio i seguridat den tráfiko

Minister presidènt, Sr. Eugene Ruggenaath tambe a risibí e delegashon na Fort Amsterdam. Despues di esaki e delegashon a realisá interkambionan di informashon ku representantenan di e Ministerionan di Asuntunan General (AZ), Salubridat bienestar i naturalesa (GMN), Tráfiko Transporte i Planifikashon Urbano (VVRP) i Desaroyo ekonómiko (MEO). Durante e interkambio aki e delegashon a hasi un presentashon riba nan meta i posibilidat pa un koperashon mas supstansial.

Seguidamente a konsentrá riba mobilidat di Pais Kòrsou, maneho di awa di kloaka, i tambe e sektor ku ta atendé ku aspektonan kímiko. E grupo a bishita diferente instansia ku ta kai direktamente bou di responsabilidat di Minister di VVRP. Esakinan ta entre otro ABC busbedrijf i e planta di tratamentu di awa sushi na Klein Hofje.

Na final di e mishon di trabou a logra kolekta informashonnan valioso pa investigashonnan ku tin di haber ku inovashon riba diferente aspekto manera mobilidat i desague. Minister Zita Jesus-Leito ta hopi satisfecho kon e deliberashon a bai ku e delegashon i ta spera ku riba un término kòrtiko, por risibí e promé resultadonan konkreto pa kontinuá ku e realisashon di e trabounan.

 

Ministerio konserní

Bo opinion