Notisia

MUNDU TA KAMBIANDO! “Ban sembra awe pa kosechá mayan”

Geplaatst op 26 Mei 2019 dor di Ministerio di Enseñansa, Siensia, Kultura & Deporte

Willemstad- Resientemente e tòp di e Ministerio di Enseñansa, Siensia, Kultura i Deporte a risibí un presentashon di representantenan di Kamara di Komersio, den personanan di sr. Bryan Irausquin i sr. Renato Ignacio tokante e vishon pa ku Kòrsou su futuro, manera ekspresá den e dokumento: Ban sembra awe pa kosechá mayan!

Segun e Kamara, ekonomia di Kòrsou den transkurso di añanan a isolá su mes for di e ekonomia mundial i a bira antikuá; no a kana pareu ku e diversifikashon i den e último 30 añanan apénas el a konosé kresementu. Den e periodo aki Kòrsou a pèrdè hopi di e bentaha ekonómiko i otro benefisionan, i den praktikamente tur e sektornan di ekonomia Kòrsou a eliminá su mes komo ku el a fiha siegamente i kontinuamente riba proyektonan lokal ku a presentá ku no a bini, òf ku nunka no por a kumpli ku e promesanan òf simplemente no tabata faktibel pa motibu di e klima di invershon. A konsekuensia di esei Kòrsou a stanka i a distansiá for di e ekonomia mundial. Awor e tin di rekuperá e retraso, no solamente pa por konektá atrobe ku e ekonomia mundial, pero tambe pa por integrá den dje ku e mira riba konservashon di e desaroyonan positivo ku mester tuma lugá den e komunidat.

Algun konklushon importante di e Kamara den su investigashon ta lo siguiente:
@ Kresementu abou òf nulo;
@ Produktividat abou;
@ Rendimentu abou di invershonnan;
@ Desaroyo negativo di e produktividat laboral;
@ Nivel muchu haltu di gastunan konsumptivo huntu ku
@un défisit riba e kuenta koriente di e balansa di pago i
@ Desempleo haltu entre hubentut.

E ekonomia suak ta pone ku e nesesidat pa un mihó reda sosial ta bira kada biaha mas importante, konsekuentemente esaki ta oumentá e gastunan pa e reda sosial i e ekonomia ta sigui suak, i asina e spiral pa bai abou ta kontinuá. Segun e palabranan di Albert Einstein: “Insanity is doing the same thing over and over again and expecting different results”. (Tradusí: lokura ta hasi e mesun kos varios bes i spera resultadonan diferente).

Segun Kamara pa bai dilanti Kòrsou mester revisá su puntonan di salida urgentemente. Esei no por logra ku asina yamá proyektonan ku ta kla pa kuminsá. E situashon ta rekerí un forma nobo di pensa, un ruta nobo, kaminda ta buta sentral:
1.) e hende,
2.) produktividat,
3.) ekonomia i
4.) nivel di bienestar.

E énfasis ta bin mas tantu riba ENSEñANSA i IMIGRASHON pa desaroyo di e poblashon, medida pa halsa produktividat i eliminashon di opstákulonan ku ta para den e kaminda di kresementu ekonómiko, pa via di e ruta aki generá e medionan nesesario pa un nivel mas haltu di bienestar di e poblashon. Ku otro palabra, ta kuminsá ku invershonnan den e HENDE i ta usa insentivo di produktividat i ekonomia komo instrumentonan usual pa mehorá e bienestar di e hende. Di e moda aki e desaroyo di e hende ta para sentral den e strategia nobo di Kòrsou. Minister Marilyn Alcalá-Wallé ta rekonosé ku mester sigui inbertí mas den e hende pa nos alkansá e hende ehemplar den un ekonomia lokal i global ku e por duna aporte real na djé. 

Durante e enkuentro e Ministerio a haña diferente informashon balioso pa por sigui hasi adaptashonnan den nos sistema di edukashon kaminda esaki ta nesesario.

#sembra #kosechá #vishon #Kòrsou

Ministerio konserní

Bo opinion