Notisia

Nivel di preis promedio 0,3 porshento mas haltu kompará ku ougùstùs 2018

Geplaatst op 9 Novèmber 2018 dor di Ministerio di Maneho di Gobernashon, Planifikashon i Servisio Públiko

Preisnan pa konsumidó na Kòrsou: sèptèmber 2018

Nivel di preis promedio 0,3 porshento mas haltu kompará ku ougùstùs 2018;
Inflashon di Kòrsou na sèptèmber 2018 ta 2,2 porshento

 Desaroyo di preis luna di sèptèmber 2018 kompará ku luna di ougùstùs 2018
E sifra índise di preis pa konsumidó (CPI, “Consumer Price Index”) di Kòrsou a subi ku 0,3 porshento na luna di sèptèmber 2018, esta di 129,3 na ougùstùs 2018 pa 129,7 na sèptèmber 2018. E kambionan di preis mas importante na sèptèmber 2018 ta subida di tarifa di elektrisidat i awa potabel ku respektivamente 4 i 3 porshento, oumento di preis di gasolin ku 1 porshento i redukshon di preis di gasoil/diesel ku 1 porshento.       

Desaroyo di preis luna di sèptèmber 2018 kompará ku luna di sèptèmber 2017
E CPI di sèptèmber 2018 (129,7) ta 3,3 porshento mas haltu ku e CPI di sèptèmber 2017, na kual momentu un CPI di 125,6 a wòrdu midí. E sifra aki (3,3%) ta indiká ku e nivel di preis pa konsumidó durante luna di sèptèmber 2018 ta 3,3 porshento mas haltu kompará ku luna di sèptèmber 2017.

 Desaroyo di preis riba termino largu: inflashon sèptèmber 2018
Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba termino largu (usualmente 12 luna). E sifra di inflashon pues ta duna un indikashon di e subida promedio di kosto di bida, i pesey ta wòrdu rekomendá komo instrumento pa indeksashon di salario, penshun, ònderstant/ benefisio sosial, sueldo mínimo i otro entrada.

 Inflashon den un sierto luna ta wòrdu kalkulá dor di komparashon di e CPI promedio di 12 luna den e luna konserní ku e CPI promedio di 12 luna den mes luna e aña anterior. Si kompará e periodo di e último 12 luna te ku sèptèmber 2018 ku mes periodo un aña anterior, ta resultá ku preisnan na averahe a subi ku 2,2 porshento: e CPI promedio di 12 luna a desaroyá di 124,9 na sèptèmber 2017 pa 127,7 na sèptèmber 2018. Kòrsou su inflashon na sèptèmber 2018 pues ta 2,2 porshento.

 Desaroyo di preis riba termino largu: inflashon último 27 luna
Durante último 2 aña i kuart (27 luna) desaroyo di preis pa konsumidó na Kòrsou a demonstrá un trend oleá, ku inflashon entre -0,5 porshento (yüli, ougùstùs i sèptèmber 2016) te ku 2,2 porshento (sèptèmber 2018). Inflashon promedio na nos pais durante e periodo aki ta 0,9 porshento.

 Esaki ta sali na kla for di datonan ku a ser publiká awe dor di Ofisina Sentral di Statistik (CBS). Por akudí riba website di CBS (www.cbs.cw) pa e tabelnan ku sifra di desaroyo di preis na Kòrsou.

 

Ministerio konserní

Bo opinion