Notisia

No mester paga derechi di importashon pa transporta Kaha di òrgel

Geplaatst op 7 Mei 2019 dor di Ministerio di Enseñansa, Siensia, Kultura & Deporte

Pa Aña di Kaha Òrgel Kòrsou ta duna eksonerashon pa trafiká e instrumento liber di derechi di importashon.

Oranjestad- Den kuadro di e Aña di Ka'i Òrgel dekretá pa Gobièrnu di Kòrsou, riba 5 di mei 2019 último Minister di Enseñansa, Siensia, Kultura i Deporte sra. drs. Marilyn Alcalá-Wallé huntu ku e Direktor di Sektor di Kultura i Deporte sra. Lizette Sambo-Velder riba invitashon, a hasi un bishita di kortesia na e festival di Kaha di Òrgel na Aruba "Ban topa nos cahanan di orgel". Esaki ta keda organisá anualmente pa sr. Rignald "Nai" Felicia ya pa 10 aña konsekutivo.

Minister sra. Marilyn Alcalá-Wallé na nòmber di Gobièrnu di Kòrsou a hasi entrega di un karta na e Minister di Finansas, Ekonomia i Kultura di Aruba sra. Xiomara Ruiz-Maduro den kua a keda indiká ku a base di un e kolaborashon entre e Sektor di Kultura i Deporte i Aduana na Kòrsou, kahanan di òrgel di Aruba por drenta Kòrsou sin mester paga derechi di importashon. Meta di e eksonerashon aki ta pa promové i fasilitá interkambio kultural-musikal entre Aruba i Kòrsou mas tantu posibel.

Na e evenementu tabata alabes presente un kaha di òrgel di Kòrsou kompañá pa algun grupo di baile folkóriko di Kòrsou ku a kubri nan propio gastunan. Tabatin un total di 15 kaha di òrgel na e festival entre nan esun di Kòrsou. Tokadónan di ka'i òrgel por konta ku kolaborashon tambe di "Directie Cultuur Aruba" den ehekushon di e proyekto aki.

Di e forma aki Gobièrnu di Kòrsou ta kumpliendo ku e petishon di doñonan i tokadónan di Kaha Òrgel.

 

Ministerio konserní

Bo opinion