Notisia

NO TA KÒRSOU TA DISIDÍ KEN TA HAÑA NASHONALIDAT HULANDES. DUNA I KITA NASHONALIDAT TA BAI SEGUN LEI DI NASHONALIDAT.

Geplaatst op 20 Ougùstùs 2018 dor di Ministerio di Maneho di Gobernashon, Planifikashon i Servisio Públiko

Willemstad -    Kòrsou, segun Statüt, ta outónomo den atendé tur asuntu di su siudadanonan ku eksepshon di (1) Defensa Militar; (2) Relashonnan Eksterior i (3) Nashonalidat. Ta p’esei Gobièrnu di Kòrsou, kontrali na loke hopi hende ta pensa, no tin nada di outoridat pa disidí nada pa loke ta trata dunamentu i kitamentu di pasport. Tur kos ku tin di aber ku nashonalidat i relashoná ku esei pasport ta keda regla konforme lei i instrukshonnan di Gobièrnu di Reino. Kranshi den esaki pues mester sigui instrukshon ku bini di Hulanda. Realidat ta ku tin persona ku a haña pasport hulandes pa 15 aña òf mas pa motibu di  interpretashon  inkorekto di lei. Sinembargo, esaki no ta duna e persona derecho pa keda mantené nashonalidat i pasport Hulandes.

 

E echo ku tin personanan ku ta bai Kranshi pa kambia pasport ku a kaduká i ta haña di tende ku nan ta pèrdè nashonalidat Hulandes tin di aber ku fout ku a keda hasí den pasado. E fayo aki ta pone ku e persona a haña nashonalidat Hulandes di forma ilegal.  Anto, awor ku a deskubrí e fout ei mester koregí esaki.

 

Ta asina ku a duna e lei tokante siudadania hulandes un interpretashon i aplikashon robes durante di e periodo di promé di sèptèmber 1992 i promé di aprel 2003. Esaki a buta ku den hinter Reino (tambe na Kòrsou) a naturalisá menornan di edat di forma inkorekto. Durante di e periodo ei menornan di edat ku tabata inskribí den registro sivil na Antia òf Aruba tambe a keda naturalisá huntu ku nan mayornan. Esaki sin importá si e yu tabatin pèrmit di estadia. Segun e lei ta solamente e yunan ku tabatin pèrmit di estadia por a keda naturalisá na momentu ku nan mayor a naturalisá.

 

Entre tantu tin tres aña kaba ku Kranshi tin instrukshon di Gobièrnu di Reino pa hasi kontrol riba tipo di kasonan asina. Entrante 2015 a kuminsá kontrolá pa mira si tur persona ku entre di 1992 i 2003 tabata menor di edat i a keda naturalisá huntu ku nan mayornan, tabatin derecho pa keda naturalisá. Den kasonan ku resultá ku e persona no tabatin pèrmit di estadia na momentu di a keda naturalisá entre di 1992 i 2003, lo trata di resolvé e problema pa personanan nanse na Kòrsou dor di dun’é un pèrmit di estadia ku forsa retroaktivo te ku e fecha ku el a keda naturalisá. Di e forma aki ta logra ku e persona en kuestion ta ‘legalisá’ su naturalisashon.

 

Pa loke ta trata e persona ku a nanse den eksterior i ku no por proba ku e tabatin un pèrmit di estadia na momentu ku el a keda naturalisá huntu ku su mayor entre promé di sèptèmber 1992 i promé di yüni 2003, t’asina ku su nashonalidat lo keda revoká.

Pa informashon por yama sra. Kesha Camelia na 527-5635

Ministerio konserní

Bo opinion