Notisia

No tin desishon formal pa fleksibilisá merkado laboral.

Geplaatst op 4 Febrüari 2019 dor di Ministerio di Desaroyo Sosial, Labor i Bienestar

Willemstad - Ministerio di Desaroyo Sosial, Trabou i Bienestar (SOAW), a tuma nota di diskushonnan relashoná ku e “Konbenio di Kolaborashon pa un Strategia di Kresementu pa Kòrsou” (Samenwerkingsconvenant Groeistrategie Curaçao) ku Gobièrnu di Kòrsou a firma ku Gobièrnu di Hulanda, pa realisá un kresementu ekonómiko pa Kòrsou.

E diskushonnan ta bai akompañá pa bastante prekupashon bou di prinsipalmente e gremio sindikal i organisashonnan sosial den nos komunidat. Esaki, basá riba e parti den kua ta menshoná ku Gobièrnu ta preparando un trayekto di legalisashon pa suavisá Lei di Retiro i di otro banda krea un kuadro di garantía pa aplikashon korekto di e provishonnan pa protekshon di e trahadó, segun e konsepto yamá “Flexicurity”.

Den un intento pa evitá mas konfushon i teniendo kuenta ku e prekupashonnan ku ta biba, Ministerio di SOAW ta partisipá lo siguiente. E filosofía básiko di e strategia pa kresementu ekonómiko tin komo meta final: logra mas aktividatnan empresarial-komersial i oumento di kuponan di trabou i kalidat di empleo (salario). Esaki ta enserá mas tantu hende na trabou, loke mester redundá den progreso sosial i bienestar general pa pueblo di Kòrsou.

Sinembargo, e teksto ariba menshoná por keda interpretá komosifuera ya kaba Gobièrnu a tuma desishon pa fleksibilisá merkado laboral pa medio di suavisá Lei di Retiro vigente, pa por fasilitá retiro di trahadó i tumamentu di hende den servisio.

Ministerio di SOAW ta klarifiká ku Gobièrnu no a tuma ningun desishon den e kuadro aki.

Ku otro palabra no tin un proposishon ni desishon di Gobièrnu pa fleksibilisá Lei di Retiro.

Mas aleu Ministerio di SOAW ta informá ku tin palabrashonnan konkreto ku partnernan sosial. Huntu e entidatnan aki lo enkaminá un proseso di evaluashon di e “Infrastruktura Sosial-laboral” aktual pa loke ta trata su funshonamentu, su efektividat i kumplimentu ku propósito di e lei i reglanan ku a keda establesé, na momentu ku nan drenta na vigor. E evaluashon lo ta den kuadro di efektividat di e leinan ku a keda inventarisá. Ta trata aki entre otro protekshon di trahadó, stipulashonnan di seguridat laboral i normanan internashonal manera e.o. “Decent Work”. Tambe “Health & Safety on the Workplace”, konforme rekomendashon i resolushonnan di ILO.

Ministerio di SOAW ta reafirmá ku tur proposishon relashoná ku eventual adaptashonnan di lei òf reglanan vigente den nos infrastruktura sosial-laboral, lo keda debidamente diskutí den plataformanan ofisial di diálogo (tripartit) i di konsulta. Ademas lo duna partisipashon na otro gremio i instansianan relevante pa duna nan aporte, promé ku Gobièrnu yega na un desishon. Resultado final mester ta un balansa apropiá entre fushonamentu efektivo di nos merkado laboral i sufisiente protekshon kontra trato inhusto di trahadó. E balansa aki finalmente mester fomentá kresementu ekonómiko duradero ku mester tradusí su mes den progreso sosial i bienestar general pa pueblo di Kòrsou.

Ministerio konserní

Bo opinion