Notisia

Nos a drenta un aña nobo.

Geplaatst op 2 Yanüari 2019 dor di Ministerio di Enseñansa, Siensia, Kultura & Deporte

Kerido siudadano i amigunan,

Nos a drenta un aña nobo.
Un otro aña kaminda riba e promé dia nos ta tuma resolushonnan i hasi promesanan pa ku restu di e aña. Nos kada unu ta tuma nos mes resolushonnan: por ehèmpel pa biba mas salú, pa biba un bida mas trankil i sin strèss, pa dediká mas tempu na famia etc. Mi tambe a pone di mi nan.

Pero tin resolushonnan mas grandi ku nos tin ku tuma! Komo Minister ami ke gradisí un i tur ku a yuda pa sigui konstruí nos pais den 2018, i prinsipalmente esnan ku a traha inkansabelmente pa mehorá nos kampo di enseñansa, siensia, kultura i deporte. Nos no a yega ainda. Tin hopi trabou pendiente!

Nos #huntu tin un tarea pa realisá ku ta huntu nos por konstruí un mihor pais i nashon pa nos por biba huntu aden. Ora nos tur traha huntu nos ta nota e diferensia real.

Amigunan,
E aña ku gobiernu di Kòrsou a dekretá komo e Aña di Ka’i Orgel. Un aña ku nos ta buska e balansa den nos historia i aspektonan kultural i festivo i tambe e retonan ku ta warda nos. Mi ke pa nos enfoká seriamente tambe riba e retonan ku nos tin nos dilanti, i pensa kon #huntu nos por atendé ku kada un di nan.

For di aworaki mi ke yama danki na boso tur pa e sosten na Kabinete Rhuggenaath. Mi ke desea kada un di boso un aña nobo próspero yená ku pas, produktividat i seguridat.

Laga nos tur realisá ku awe ta e promé pagina blanku di un buki di 365 pagina. Laga nos #huntu skirbi un bon buki!

Felis Aña nobo!

 

Ministerio konserní

Bo opinion