Notisia

Nos tur konosé un persona ku meresé un Kondekorashon Real

Geplaatst op 29 Ougùstùs 2019 dor di Ministerio di Asuntunan General i Promé Minister

WILLEMSTAD - Ta un tradishon ku tur aña riba dia di Rei nos ta duna honor na personanan ku a duna aporte eksepshonal na nos komunidat. Riba e dia aki algun di e nominadonan ta risibí un kondekorashon di Reino Hulandes serka Gobernador di Kòrsou. E próksimo selebrashon di dia di Rei ta 27 di aprel 2020. E fecha aki ta mustra hopi leu. Mester tene kuenta ku e prosedura ta tuma tempu. P’esei Gobièrnu di Kòrsou ta hasi un apelashon na abo i henter pueblo di Kòrsou pa informá Komishon Kondekorashon di Rei ken ta bini na remarke pa risibí un Kondekorashon di Rei otro aña. Abo konosé un persona ku por bini na remarke pa risibí un Kondekorashon di Rei?

Dia 27 di sèptèmber próksimo ta e último dia ku bo por entregá un formulario ku informashon di bo nominado.

Ken ta bini na remarke pa keda Kondekorá?
Un persona ku ta bini na remarke pa risibí un Kondekorashon ta un persona ku a kontribuí di forma eksepshonal na nos komunidat. E kontribushon por ta sea pa medio di su aporte na bienestar di nos hóben, adulto òf nos grandinan. Tambe un persona ku a kontribuí òf destaká di forma eksepshonal na deporte, enseñansa òf siensia na Kòrsou por bini na remarke pa risibí un Kondekorashon.

Kon abo por nominá bo kandidato?
Ku tiki esfuerso abo por kontribuí pa un persona ku meresé rekonosementu na nivel di Reino Hulandes. Pa nominá bo kandidato bo mester buska, yena i entregá un formulario pa hasi bo petishon. Huntu ku e formulario tambe bo mester entregá algun dokumento importante. Banda di informashon di kontakto di e nominado, e petishonario mester entregá informashon tokante trabou, aktividatnan sekundario i méritonan speshal.

E formulario ta optenibel na Lokèt di Pèrmit (Saliña 127). Tambe por 'download' e formulario direktamente aki.

Despues ku yena e formulario deposit’é den un di e buzonnan ku tei spesial pa e okashon aki na Lokèt di Pèrmit. Tambe ta posibel entregá bo formulario di forma digital via kondekorashonreal.cur@gmail.com

No lubidá ku dia 27 di sèptèmber awor ta e último dia ku bo por entregá bo formulario ku informashon di bo nominado.

Kiko ta pasa despues?
Komishon di Kondekorashon ta evaluá i kontrolá tur informashon ku nan risibí. Despues di evaluá i kontrolá tur informashon e komishon ta entregá e lista di nominadonan na Gobièrnu di Kòrsou pa trata esaki den Konseho di Minister. Seguidamente e nòmbernan ta bai pa Gobernadó sra. Lucille George-Wout, ku na su turno ta manda e nòmbernan pa Hulanda pa evaluashon i aprobashon final. E trayekto aki ta tuma tempu, p’esei bo mester entregá informashon di bo nominado na tempu. 

Bo tin pregunta òf ke mas informashon?
Si bo mester di yudansa pa yena e formulario òf si bo tin pregunta tokante Kondekorashon di Rei tuma kontakto ku sra. Lucy Tielen na telefòn 526-1239.

Ministerio konserní

Bo opinion