Notisia

OFISINA I PLATAFORMA DI MINEGOSHI PORFIN TA UN ECHO

Geplaatst op 1 Òktober 2019 dor di Ministerio di Desaroyo Ekonómiko

WILLEMSTAD- Ministerio di Desaroyo Ekonómiko (MEO) tin entre otro komo tarea pa desaroyá i stimulá mas empresarionan sólido i duradero na Kòrsou. Un di e formanan ku e ministerio a skohe pa duna forma na esaki ta, dor di establesé un plataforma ku ta karga e nòmber di MiNegoshi ku e meta pa duna guia i sosten na empresarionan nobo i esnan eksistente

 

Empresanan mikro, chikí i mediano (SME) ta representá e wesu di lomba di e ekonomia di nos pais. E sektor aki ta unu ku sin duda algun ta duna un gran aporte diario na e desaroyo di nos ekonomia i ta p’esei MEO ta keda hasi esfuersonan kontinuo pa por sigui fortalesa i krese e sektor aki.

Un di e esfuersonan ku e ministerio a bin ta traha riba dje di forma inkansabel, ta e plataforma i e wèpsait di MiNegoshi.
MiNegoshi ta konsistí di dos komponente sumamente importante pa yuda guia i sostené e empresario mikro, chikí i mediano i hasi su meta di lanta òf ekspandé su propio negoshi muchu mas aksesibel
Algun tempu pasá MEO ya a hasi lansamentu ofisial di e portal www.minegoshi.org kaminda e ministerio a sentralisá tur informashon di importansia pa e (futuro) empresario ku link ku ta hiba na e diferente wèpsaitnan di kada stakeholder di relevansia pa e empresario. Aparte di e portal aki, MiNegoshi ta ofresé tambe un plataforma kaminda konhuntamente ku otro partnernan den e sektor ta brinda asistensia na e empresario riba e kaminda pa alkansá su meta. Partnernan den e plataforma aki ta entre otro entre otro, BAB, Kámara di Komersio, Fundashon Marshe, CITI, EU desk Curaçao, Korpodeko, Qredits i OBNA. E plataforma aki ta nifiká ku e empresario por akudí personal na e ofisina di MiNegoshi situá na piso 3 den e edifisio di AmiDos na Pletterijweg 43, Parera i kaminda ta nesesario e trahadónan di e ministerio lo por referí esaki na e partner ku lo por asistié mihó.
Huntu ku tur esaki MiNegoshi ta ofresé tambe asistensia ‘one-on-one’ konfidensial i grátis na e empresario, training den grupo riba tópikonan di importansia pa e sektor di SME i asistensia pa start-up i formalisá bo empresa. Pero tambe guia pa yega na kapital, formulashon di un bon business plan, uso di teknologia i komersio digital, fortifikashon di kapasidat di gerensia i hopi mas.
 E enfoke prinsipal di MiNegoshi ta, pa promové mas empresa mikro, chikí i mediano formal i duradero, promové kresementu di e empresanan eksistente, enkurashá mas inovashon, oumento di produktividat i stimulá nos empresanan pa eksportá.

Den un ambiente ameno ku minister di Desaroyo Ekonómiko, sra Giselle mc William i stakeholdernan relevante, MEO a presentá e plataforma ofisialmente i tambe e lokalidat kaminda empleadonan di e ministerio lo bai risibí i duna asistensia na e empresario.
Durante e okashon aki minister mc William a suprayá ku e intenshon di MiNegoshi no ta pa remplasá otro organisashonnan ku aktualmente ta brindando un servisio spesífiko na empresarionan. Mas bien MiNegoshi lo bai traha konhuntamente ku partnernan den e sektor aki pa asina krea un laso fuerte kaminda e empresario tin e espasio i e fundeshi sólido pa asina sigui krese aun mas. Pa sa mas di MiNegoshi por bishita nos portal www.minegoshi.org libremente. Tambe por manda nos un mail ku kualke pregunta na info@Minegoshi.org òf yama nos na 462-1444 (ekst 114, 133 òf 138)

 

Ministerio konserní

Bo opinion