Notisia

Outoridat di Aviashon Sivil di Kòrsou ta haña training den uso di sistema outomatisá pa atministrá insidentenan aéreo

Geplaatst op 7 Òktober 2018 dor di Ministerio di Tráfiko, Transporte i Planifikashon Urbano

Willemstad - Durante tres dia, inspektornan di Outoridat di Aviashon Sivil di Kòrsou (CCAA) a haña un training den uso di un sistema digital internashonalmente rekonosé yamá ECCAIRS. Sr. F. Rodriguez di Corporación Centroamericana de Servicios de Navegación Aérea (COCESNA) a bin Kòrsou speshal pa duna CCAA e training. COCESNA ta e agensia intergubernamental ku ta proveé servisio di nabegashon aéreo na seis pais sentroamerikano.

ECCAIRS ta un sistema digital pa atministrá insidente ku ta rekonosé pa e organisashon mas haltu den sektor di aviashon sivil ku ta e Organisashon Internashonal di Aviashon Sivil (ICAO). Kontenido di e training a kubri tur e áreanan kardinal di e sistema i alabes e la ekipá kada inspektor ku e konosementu i abilidat pa registrá, atministrá i tambe analisá datonan di kada insidente ku CCAA risibí. Ademas e sistema di ECCAIRS ta un bon instrumento pa e inspektornan den nan trabounan diario di inspekshon den e sektor di aviashon sivil.

For di 2016, Outoridat di Aviashon Sivil di Kòrsou, a kuminsá ku un trayekto di digitalisashon di su prosesonan. Anteriormente a digitalisá e sistema di lisensia i tambe esun di pasa eksámen di piloto, kontròl aéreo i mekániko na CCAA. Pronto CCAA ta bai aserká tur e organisashonnan ku ta kai bou di su supervishon, pa duna mas informashon riba e sistema nobo di ECCAIRS ku ta den proseso di implementashon. Ku implementashon di e sistema aki CCAA ta dal un paso mas den e trayekto pa bandoná kategoria 2 di FAA i tambe kuminsá prepará pa e audit di ICAO den 2019.

Minister di Tráfiko, Transporte i Planifikashon Urbano, sra Zita Jesus-Leito ta sostené e paso firme aki i ta enkurashá CCAA pa sigui ku e trayekto di digitalisashon i training. Esaki no únikamente ta halsa kalidat di e trabounan di supervishon riba e organisashonnan den e sektor di aviashon sivil sino tambe riba nivel di pais CCAA ta bai funshoná mas efikas i efisiente.

Ministerio konserní

Bo opinion