Notisia

Pa Gobièrnu di Kòrsou trankilidat i garantia di suministro di kombustibel ta na promé lugá

Geplaatst op 18 Òktober 2019 dor di Ministerio di Asuntunan General i Promé Minister

WILLEMSTAD – For di momentu ku a tuma nota di e susesonan ku a surgi relashoná ku Refineria Isla riba 15 di òktober último, Gobièrnu di Kòrsou – komo representante di akshonista di kompanianan di Gobièrnu Aqualectra N.V, Curoil N.V. i Refineria di Kòrsou N.V. (RdK) – a kuminsá aktua di forma aktivo pa haña konosementu i un bon bista di loke ta pasando. 

Minister Girigorie, den su ròl komo Minister di Asuntunan General interino, huntu ku Minister Giselle Mc. William di Desaroyo Ekonómiko, a sinta ku representantenan sindikal PWFC i APRI pa tende di nan banda kiko ta e kousanan spesífiko ku a kondusí na e akontesimentunan i tambe Refineria Isla B.V. Ademas, a sinta ku e Direktor di Aqualectra Curoil i RdK pa asina risibí un bista kompleto. Di e forma aki a bin realisá ku Aqualectra na promé instante e pone beslag riba fondonan di RdK, pa despues RdK na su turno a pone beslag riba fondonan di Aqualectra ku ta destiná pa Refineria Isla.  Den e kuadro ei, huntu ku tur e partidonan embolbí, Gobièrnu den su posishon komo akshonista di RdK, Curoil i Aqualectra a palabrá ku sindikatonan un akuerdo amplio pa por garantisá kontinuidat di funshonamentu di Refineria den e próksimo lunanan, durante e transishon pa futuro

Esaki ta nifiká ku mester yega na un solushon kaminda ta resolvé e diferente desafionan ku kada partido ta enkontrá den e trayekto aki, sin ku esaki mester (sigui) resultá den eskalashon di ponementu di beslag. Tambe mester buska formanan pa mantené e pas nesesario pa finalmente yega na un resultado positivo ku ta garantisá kontinuidat di nos refineria.

Ku esaki na mente, Gobièrnu di Kòrsou – apesar di por komprondé e diferente akshonnan ku a tuma lugá – tin oido pa e preokupashon ku ta biba den nos komunidat, en espesial serka trahadónan di refineria.

Importante pa Gobièrnu den tur esaki ta trankilidat i garantia di suministro di kombustibel.

Anekso: Karta deklarashon di bon intenshon.

Ministerio konserní

Bo opinion