Notisia

Paga mitar "Collegegeld"

Geplaatst op 25 Yüli 2018 dor di Ministerio di Enseñansa, Siensia, Kultura & Deporte

E montante di “collegegeld” pa hopi hende por ta un opstákulo na komienso di nan estudio. Pa e motibu aki Gobièrnu di Reino Hulandes a tuma e desishon pa entrante e aña eskolar 2018-2019, e studiante den su promé aña eskolar di “hoger onderwijs”, paga solamente mitar di e “collegegeld”. E studiante ta paga € 1.030 na lugá di € 2.060 pa e aña eskolar 2018-2019.

E deskuento aki ta konta pa nos studiantenan di Kòrsou ku ta bai kuminsá ku nan estudio na Hulanda entrante di e aña eskolar 2018-2019. Studiantenan ku ta bai studia pa “lerarenopleiding” na Hulanda ta risibí èkstra deskuento riba nan “collegegeld”.  Di e forma aki Gobièrnu di Reino Hulandes ta stimulá pa yena e kuponan di trabou den enseñansa.

Kondishonnan pa risibí e deskuento di mitar “collegegeld” den e promé aña di estudio:

  • Durante òf despues di aña eskolar 2018-2019 e studiante ta kuminsá ku un estudio na un hogeschool òf universidat finansiá dor di Gobièrnu;
  • E studiante ta bai sigui pa promé bes un estudio riba nivel di bachelor òf associate degree;
  • E studiante ta kumpli ku su pago di “collegegeld”. Esaki ta konta pa studiantenan ku ta sigui estudionan “voltijd”, “duaal”, “deeltijd” i studiantenan ku ta studia na Open Universiteit i university colleges.

Gabinete Rhuggenaath ta satisfecho ku e koperashon den Reino Hulandes, ku ta benefisiá nos studiantenan tambe. Minister Marilyn Alcalá-Wallé komo titular di Enseñansa ta sigui traha na bienestar i futuro di nos hóbennan pa sigui eduká i edifiká un komunidat sano.

Pa mas informashon tokante kondishonnan di deskuento por bishitá e wèpsait: www.rijksoverheid.nl

Ministerio konserní

Bo opinion