Notisia

Personal di Kadaster por ta trankil!

Geplaatst op 13 Sèptèmber 2018 dor di Ministerio di Tráfiko, Transporte i Planifikashon Urbano

Willemstad – Minister Jesus-Leito a enfatisá durante e reunion ku personal di Kadaster ku no tin un konflikto laboral. Huntu ku SOAB a papia ayera, 12 di sèptèmber, ku personal di Fundashon Kadaster. Trahadónan a haña e oportunidat pa hasi diferente pregunta pa aklará nan preokupashonnan. E reunion tabata unu informativo pa e trahadónan. Despues di a papia ku nan representantenan sindikal, a reanudá trabounan diario. Kadaster awor ta habri bek pa públiko.

E impreshon tabata reina ku trabou i kondishonnan sekundario di trahadónan lo por a sufri mirando e petishon di Gobièrnu na Kadaster pa entregá 15 mion di reservanan dimas (“over reserves”) ku e fundashon ta disponé di dje. Den e kuadro aki, trahadónan di Kadaster a ekspresá nan preokupashon durante e último 2 dianan aki atraves di un reunion ku nan sindikato bou di oranan di trabou. Minister Jesus-Leito ta komprondé esaki mirando e situashon ku nos pais ta pasando aden. Pa e motibu ei mes, a reuní ku ABVO ayera huntu ku kolega Minister Presidènt, Minister di Finansa, i Minister di Desaroyo Ekonómiko, i ayera ku e personal.

Fundashon Kadaster ta e organisashon di Gobièrnu ku ta registrá tur derecho riba propiedatnan na Kòrsou, manera entre otro tereno, kas, avion, barku etc. Kadaster ta kobra siudadanonan pa e servisionan ku e ta brinda nan. Promé ku e fundashon aki a keda fundá, e parti di hipotek i kadaster tabata kai bou di responsabilidat kompleto di gobièrnu. Na aña 2002, Gobièrnu a disidí pa lanta un fundashon ku lo a bai hasi e tareanan aki pa gobièrnu.

Gobièrnu a skohe na 2006 pa Kadaster mes kobra pa su servisionan i manehá e fondonan aki ku e ta produsí mensualmente i asina kubri tur su gastunan operashonal. Lo kual no a kambia ta e karakter di e produktonan ni e ingresonan. Esakinan ta keda plakanan ku gobièrnu a pone na disposishon di un fundashon en bes ku nan ta drenta kaha di gobièrnu direktamente. Gobièrnu mester responsabilisá su mes na Parlamento di Kòrsou pa e manera ku Kadaster ta manehá e fondonan aki.

Maneho general di gobièrnu ta ku en prinsipio no ta pèrmití un fundashon di gobièrnu pa krea reserva. Reserva ta nifiká ku e organisashon ta haña mas fondo aden atraves di e servisionan ku e ta kobra pe, ku loke e tin mester pa kubri tur su gastunan i ta sobra un montante. E montante ta keda pues reservá. Dor di krea reserva innesesario, gobièrnu i pueblo ta ser perhudiká dor ku e plakanan aki ta keda para den kaha di e fundashon sin ku tin propósito konkreto pa esaki, mirando ku tur gastu operashonal inkluso esnan di personal (manera salario, penshun, etc) ya a keda kubri.

Minister Jesus-Leito a splika e personal den un enkuentro di ayera ku e reservanan dimas ku Kadaster a kobra ku ta suma un montante di 15 mion florin, mester a bin tur tempu den kaha di gobièrnu i ku durante añanan esaki no a sosodé pa entre otro motibu di kambionan den gobièrnu di turno. Banda di esaki, e accountant di gobièrnu ku su profeshonalnan a hasi análisisnan nesesario pa asina por a konstatá ku e kitamentu di reserva lo no afektá e kontinuidat di e fundashon.

Minister Jesus-Leito ta responsabel pa kalidat di e servisionan di Kadaster, i su direktiva ta responsabel pa e operashon. E direktiva ta manehá tur e medionan ku e fundashon tin na su disposishon pa asina por funshoná diligentemente. Pues desishonnan pa ku personal ta kai bou di responsabilidat di e direktiva di e fundashon aki.

Minister Jesus-Leito lo sigui duna informashon na personal i komunidat en general di e trayektoria aki i di e ròl di Kadaster.

Ministerio konserní

Bo opinion