Notisia

Polis ta entregá pakete na famianan den nesesidat.

Geplaatst op 13 Desèmber 2018 dor di Ministerio di Hustisia

Komo muestra di apresio i konsiente di su responsabilidat pa ku komunidat, den forma di obra di karidat, Kuerpo Polisial e aña aki a kolektá diferente komestibel i traha pakete pa entregá na esnan den nesesidat.
Departamento di Komunikashon di Polis a tuma e inisiativa algun luna pasá di aserká tur kolega den kuerpo ku e petishon pa trese komestibel, sea di bleki, bòter òf di paki ku no ta daña, pa asina ei nan por wòrdu entregá na esnan ménos pudiente den nos komunidat.
Kada departamento polisial a haña un òf mas kaha den kua nan por a hinka nan komestibelnan. Despues a pasa rekohé esakinan pa asina traha e paketenan.
E reakshon di trahadónan den kuerpo pa ku e proyekto noble aki tabata grandi i a logra sera alrededor di 45 pakete formal pa diferente famia. Personal di RST, KMar i Wardakosta tambe a partisipá den e proyekto aki.
Via di instansianan sosial, iglesianan i organisashonnan den bario, a haña nòmber i direkshon di famianan den nesesidat.
Un representashon chikí di e Departamento di Komunikashon lo hiba e paketenan aki na e diferente kasnan, pa asina ei den fin di aña aki, trese alegria den mas kas aki na Kòrsou.
Di e manera aki tambe, Kuerpo Polisial ke mustra e otro banda di su kara.
Ku nos no tei únikamente pa atendé ku situashonnan ménos agradabel òf aktua di forma represivo, pero nos tei tambe pa saka un man yuda. Final di kuenta, ta pa e komunidat aki ku nos tambe ta forma parti di dje, nos ta hasié.
Nos ta spera ku kada famia ku risibí un pakete lo disfrutá di esaki.
Kuerpo Polisial ta kontentu di por a sirbi nos komunidat den e forma aki tambe.

Ministerio konserní

Bo opinion