Notisia

Porfin a lansa wèpsait di Curaçao Film Office

Geplaatst op 25 Yüni 2019 dor di Ministerio di Desaroyo Ekonómiko

Riba 2 di mei último Konseho di Ministernan a akordá e maneho di film pa e industria di film na Kòrsou. Djaluna 24 di mei Ministerio di Desaroyo Ekonómiko a presentá e maneho i tambe a lansa e website di Curacao Film Office (CFO).

Riba e website www.curacaofilmoffice.com producernan internashonal i produkshonnan lokal tambe por haña tur informashon ku ta nesesario pa graba un pelíkula na Kòrsou.  E website ta konsistí di un “production directory” na unda e sektor privá ku negoshinan ku por duna un servisio na e industria di film por inskribí nan mes. Di peñadó di kabei, estetisista, kosedó te kompanianan di catering, hür di outo òf tow-truck, tur ku ta inskribí ta haña un página manera un kuríkulo riba e website di CFO ku dor di dje e producernan internashonal mes ora por mira kuantu trahadó nos tin pa un produkshon di film. P’esei e CFO ke hasi un petishon na tur hende ku ke ofresé su servisio na e sektor aki, pa subi e website pa bo inskribí pa e “direktory” aki. Úniko eksigensia ta ku tin ku demostrá di tin sufisiente eksperensia.

A sali un par di puntonan klave for di e presentashon di e maneho di e CFO.

E ofisina di film entre otro lo bai traha riba un asina yama “Red Carpet Treatment”. Esaki ta enserá ku ta bai wak kon pa simplifiká e proseduranan ku e producernan di film tin di aber kuné, manera imigrashon, duana ku pèrmit.

E CFO tambe a entrega un plan pa un insentivo fiskal pa film. Esaki ta enserá ku lo ofresé un bentaha di impuesto na produkshonnan ku ta bin graba na Kòrsou riba un sierto bùdgèt. E insentivo aki lo bai hasi Kòrsou mas atraktivo komo lokalidat pa filma.

For di presente e ta obligá pa produkshonnan di media visual registrá na e CFO. Asina e CFO por duna un mihó servisio i e industria por wòrdu monitoriá mas mihó. Ku e registrashon aki tambe por generá datonan pa midi e impakto ku e industria aki tin na nos ekonomia.

E maneho ta poné atenshon riba e infrastruktura di e industria di film na Kòrsou. Tin desaroyonan ku ta nesesario pa stimulá e sektor di film lokal. E presensia i e supsistensia di por ehèmpel e film festival, e fondonan ku tin pa film òf e plataformanan ku tin pa kolaborá ta importante pa e desaroyo di e merkado lokal.

E maneho tambe ta paga atenshon na edukashon, training i kapasitashon (kapasitá building) den e industria di film. Ta importante pa nos eduká mas hende pa traha den e industria aki pero tambe ku nos profeshonalnan eksistente ta siña traha riba un nivel mas internashonal.

Ta bai lanta un taskforce pa sostené e CFO. E taskforce aki lo tin e film commissioner na kabes i lo konsistí di miembronan di diferente Ministerio ku mester yuda den ehekushon di diferente puntanan ku e maneho ta deskribí. Di e forma aki ta krea e trato di Red Carpet.

Na final nos por anunsiá kaba ku tin 2 proyekto ku ta bin graba na Kòrsou den periodo di sèptèmber te ku novèmber. E promé ta e pelíkula ‘Vliegende Vissen Verdrinken Niet’I e di dos ta   un dokumental di VPRO di ‘De Droevige Kampioen’ ku ta e historia di Robert Hosé, kampion di pingpong den añanan 70. Tur dos di e produkshonnan lo ta un kolaborashon di un producer di Hulanda ku un tim di Kòrsou.

 

Ministerio konserní

Bo opinion