Notisia

Preisnan pa konsumidó na Kòrsou: òktober i novèmber 2018

Geplaatst op 19 Desèmber 2018 dor di Ministerio di Maneho di Gobernashon, Planifikashon i Servisio Públiko

Òktober: preisnan ta baha (-0,2%), inflashon 2,3 porshento
Novèmber: preisnan ta subi (+0,4%), inflashon 2,4 porshento

Desaroyo di preis durante òktober i novèmber 2018 kompará ku e luna anterior

Durante último tres luna, sifra índise di preis pa konsumidó (CPI, “Consumer Price Index”) na Kòrsou a desaroyá di 129,7 (sèptèmber 2018) pa primeramente 129,5 (òktober 2018, -0,2%) i seguidamente 130,0 (novèmber 2018, +0,4%).

 Desaroyo di preis na òktober 2018 ta wòrdu karakterisá prinsipalmente dor di bahada di preis di gasolin (-2%), awa potabel (-2%) i elektrisidat (-5%), mientras ku na novèmber 2018 espesialmente bahada di preis di gasolin (-1%) i oumento di preis di awa potabel (+1%), elektrisidat (+3%) i gasoil/diesel (+5%) ta hunga un rol signifikante.

 Desaroyo di preis durante òktober i novèmber 2018 kompará ku mes luna na 2017

Mientras na òktober 2018 (129,5) e CPI ta 3,0 porshento mas haltu kompará ku òktober 2017 (125,7), na novèmber 2018 (130,0) e CPI a resultá 3,1 porshento mas haltu en komparashon ku novèmber 2017 (126,1). E sifranan aki (3,0% i 3,1%) ta duna un indikashon ku nivel di preis pa konsumidó durante lunanan di òktober i novèmber 2018 ta respektivamente 3,0 i 3,1 porshento mas haltu kompará ku mes lunanan di 2017.

Desaroyo di preis riba termino largu: inflashon òktober i novèmber 2018

Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba termino largu (usualmente 12 luna). E sifra di inflashon pues ta duna un indikashon di e subida promedio di kosto di bida, i pesey ta wòrdu rekomendá komo instrumento pa indeksashon di salario, penshun, ònderstant/ benefisio sosial, sueldo mínimo i otro entrada.

Inflashon den un sierto luna ta wòrdu kalkulá dor di komparashon di e CPI promedio di 12 luna den e luna konserní ku e CPI promedio di 12 luna den mes luna e aña anterior. Si kompará e periodo di e último 12 luna te ku respektivamente òktober i novèmber 2018 ku mes periodo un aña anterior, ta resultá ku preisnan pa konsumidó na averahe a subi ku 2,3 i 2,4 porshento. E subida aki di kosto di bida ta wòrdu reflehá dor di desaroyo di e CPI promedio over 12 luna di 125,1 na òktober 2017 pa 128,0 na òktober 2018 i di 125,3 na novèmber 2017 pa 128,3 na novèmber 2018. Inflashon di Kòrsou na òktober i novèmber 2018 pues ta 2,3 i 2,4 porshento respektivamente.

Desaroyo di preis riba termino largu: inflashon último 27 luna

Durante último 2 aña i kuart (27 luna) desaroyo di preis pa konsumidó na Kòrsou a demonstrá un trend oleá, ku inflashon entre -0,5 porshento (sèptèmber 2016) i 2,4 porshento (novèmber 2018). Inflashon promedio na nos pais durante e periodo aki ta 1,1 porshento.

 Esaki ta sali na kla for di datonan ku a ser publiká awe dor di Ofisina Sentral di Statistik (CBS). Por akudí riba website di CBS (www.cbs.cw) pa e tabelnan ku sifra di desaroyo di preis pa konsumidó na Kòrsou.

 

Ministerio konserní

Bo opinion