Gobièrnu di Kòrsou ta otorgá e prestigioso Premio Willem C.J. (Boeli) van Leeuwen.

 WILLEMSTAD - Riba 10 di òktober 2019 Gobièrnu di Kòrsou a otorgá e Premio Willem C.J. (Boeli) van Leeuwen na sr. Norman Moron pa su prestashon meritorio, den e ramo di músika. Entrante di aña 2019, Konseho Kultural Kòrsou tin e enkargo pa presentá un konseho na Gobièrnu di Kòrsou riba e persona òf instansia ku ta meresé e premio. Konseho Kultural Kòrsou a presentá sr. Norman Moron komo kandidato pa risibí e premio e aña akí. E premio a keda entregá pa Minister di Enseñansa, Siensia, Kultura & Deporte sra. Marilyn Alcalá-Wallé i pa Promé Minister sr. Eugene Rhuggenaath durante di un anochi ameno na Avila Beach Hotel.

Na aña 2009 riba inisiativa di diputado sra. Marilyn Alcalá - Wallé a instituí e premio Boeli van Leeuwen ku ta keda otorgá kada dos aña na un òf mas persona òf organisashon ku a alkansá prestashon intelektual ekselente riba tereno kultural, hurídiko, gubernamental, sosial òf periodístiko. E prestashon di e ganadó mester ta unu ehemplar, e mester inspirá i habri bista di komunidat riba e tereno konserní pa e aña koriente i mester surpasá frontera di Kòrsou. E aña akí, den Aña di Ka’i Orgel, a toka turno na e kategoria di kultura.

Sr. Norman Moron a promové músika di nos isla di un forma inigualabel ku energia positivo i ku hopi amor den su grabashonnan, durante su aktuashonnan lokal i internashonal. No solamente komo kompositor, pianista i artista, pero tambe komo dosente di piano, sr. Norman Moron a sa di eduká sentenáres di nos hóbennan riba tereno musikal. Semper sr. Moron a mantené kalidat artísitko di Kòrsou altu. Su partisipashon den nos farándula lokal i su sosten na nos artistanan lokal ta hasi di sr. Norman Moron un di e personahenan mas importante riba tereno musikal na Kòrsou.

Bou di presidensia di Konseho Kultural Kòrsou un hurado despues di a hasi su trabou orientativo, a proponé pa otorgá e Premio Willem C.J. (Boeli) van Leeuwen na sr. Norman Moron, un di nos baluartenan importante riba tereno di músika.

Gobièrnu ta yama danki na tur e miembronan di Konseho Kultural Kòrsou pa nan tarea di a skohe i konsehá Gobièrnu.

--
KOMUNIKASHON
Ministerio di Enseñansa, Siensia, Kultura & Deporte

** Riba e potrètnan athunto por tuma nota di e momentunan ameno i entrega di e premio na Avila Beach Hotel den presensia di su ekselensia Gobernador sra. L.George-Wout i gabinete Rhuggenaath i miembronan di Konseho Kutural Kòrsou.