Preparashonnan a start pa proyekto ‘Kunukito Hidropóniko’

Geplaatst op 16 Mei 2018 dor di Ministerio di Salubridat Públiko, Medio Ambiente i Naturalesa

Den kuadro di e Memorandum of Understanding entre gobièrnu di Colombia i gobièrnu di Kòrsou (2014) i Memorandum of Understanding entre Ministerio
di Salú, Medio Ambiente i Naturalesa (GMN) i gobièrnu di Riohacha Colombia, Ministerio di GMN a kuminsá ku e preparashonnan pa e proyekto ‘Kunukito Hidropóniko’. E proyekto aki ta forma parti di e di 4 fase den e koperashon entre ministerionan di GMN i MEO, Adeck (organisashon empresanan chikí i mediano), APC (Agencia Presidencial de Coperacion) i Universidad de la Guajira di Colombia riba tereno di ‘food and nutrition security’. E koperashon konkreto entre e organisashonnan menshoná a inisiá for di 2016.

E proyekto ‘Kunukito Hidropóniko’ ta enserá entre otro ku ta bai implementá 7 diferente téknika òf sistema di produkshon agrario riba tereno di AVB (ántes LVV). A limpia 5000 M2 di e total 33 Hèktar di tereno na AVB pa ehekutá e proyekto. Riba potrèt por mira kon a prepará e tereno.

E 7 téknikanan di produkshon agrario di proyekto ‘Kunukito Hidropóniko’.
1          Plantamentu den baki di palu den un supstansha ku awa ku ta kontené 14
            nutriente. E téknika aki ta duna bon resultado ku plantamentu di kròpsla.
2          Plantamentu den baki di palu den un sustrato di klei, kaska di aros i supstansha                     
            ku ta kontené nutriente. E téknika aki ta duna bon resultado ku plantamentu di
            kònkòmber, promentòn, tomati i silantro.
3          Plantamentu den pipanan di PVC. E téknika aki tambe ta duna bon resultado ku
            plantamentu di kròpsla.
4          Plantamentu den saku di plèstik pretu ku diferente sustrato. Un bon téknika i
            simpel pa produsí chili peper i promentòn.
5          Organoponia. Téknika di produkshon ku ta hasi uzo di sustrato di
            “vermicompost”, klei di laman, santu i kaska di aros. Organoponia tambe ta duna
            bon resultado ku plantamentu di promentòn, tomati i salada.
6          Biofertilisante den 2 kiosko. Téknika di produkshon di nutriente orgániko.
7          Téknika pa produsí kuminda di bestia.

E tereno ya ta limpiá i egalisá i e siman aki a traha tambe riba diferente otro aspekto di e proyekto. E profesornan di Riohacha entre tantu ta na Kòrsou kaba i huntu ku AVB ta trahando por ehèmpel riba diseño i ubikashon di e diferente téknikanan di produkshon agrario.
Tereno
1 Riba potrèt por mira kon e tereno a keda prepará.
Hipodromo
2 Riba potrèt Minister mr. Suzanne Camelia- Römer huntu ku invitadonan di Universidad de la Guajira, señor Murray di GMN i señor Geertruida di Adeck durante un presentashon.  
Reunion 1
3 Riba potrèt drpd; Wilbert Geertruida (Adeck), Gabriel Murray (SD GMN), Malka Moreno, Minister GMN mr. Suzanne Camelia- Römer, Jairo Rosado i Gerritson Doran (AVB). Malka Moreno i Jairo Rosado ámbos ta di Universidad de la Guajira.


                                                            

Ministerio konserní

Bo opinion