Notisia

Promé Minister Rhuggenaath ku mishon pa kapital Washington D.C.

Geplaatst op 12 Mei 2019 dor di Ministerio di Asuntunan General i Promé Minister

WILLEMSTAD — Promé Minister Rhuggenaath lo biaha pa kapital di Merka pa un mishon di dos dia ku un delegashon konsistiendo di Refineria di Kòrsou i Curoil. E mishon ta un mishon konhunto ku Promé Minister Wever-Croes di Aruba ku tambe lo biaha ku representantenan di Refineria di Aruba.

Durante Promé Minister Rhuggenaath su promé bishita na Washington D.C., lo e tene diferente enkuentro ku Departamento di Estado (State Department), Departamento di Finansas (Treasury Department) i tambe e unidat Office of Foreign Assets Control (OFAC) kual ta responsabel pa e maneho di sanshonnan i ta e agensia ku a otorgá e lisensia spesial pa eksonerashon na Kòrsou.

Gobièrnu di Kòrsou a traha mas ku un aña intensivamente ku diferente departamentu pa logra haña e lisensia spesial pa kompanianan di Gobièrnu Curoil, CRU i Refineria di Kòrsou. Sentral durante e reunionnan na Washington D.C. ta e impakto di e situashon na Venezuela riba e paisnan Kòrsou i Aruba spesífikamente den sektor energétiko. E lisensia ta un paso importante, pero trabounan ta sigui pa eksplorá tur posibilidat pa sigurá futuro di nos refineria i kuponan di trabou.

Tambe lo reuní ku representantenan di Kongreso Merikano na Capitol Hill i organisashonnan internashonal i regional ku ta Organisashon di Estadonan di Amerika (OAS), Banko Mundial (World Bank Group) i U.S. Chamber of Commerce.

Promé Minister Rhuggenaath lo hasi uso di e oportunidat pa posishoná posibel áreanan di kolaborashon ekonómiko i  oportunidatnan di invershon na Kòrsou.

Ministerio konserní

Bo opinion