Notisia

PROMÉ MINISTER RHUGGENAATH NA COLOMBIA PA INOUGURASHON PRESIDENTE DUQUE

Geplaatst op 7 Ougùstùs 2018 dor di Ministerio di Asuntunan General i Promé Minister

Bogota - Promé Minister Eugene Rhuggenaath a yega Bogotá djadumingu anochi, unda a keda risibí pa Vise-Minister di Relashonnan Eksterior, Patti Londoño Jaramillo. Promé Minister ta di bishita na Colombia pa representá paisnan di Reino Hulandes na e inougurashon di Presidente elekto Iván Duque Márquez riba djamars 7 di ougùstùs 2018.

Promé Minister Eugene Rhuggenaath huntu ku Embahador di Reino Hulandes na Colombia, Jeroen Roodenburg, a kombersá entre otro ku Minister entrante di Komersio, Industria i Turismo, Jose Manuel Restrepo i Minister entrante di Agrikultura, Andres Valencia. A papia tokante estrechá koperashon entre Reino Hulandes, en partikular Kòrsou, i Colombia riba promoshon di komèrsio, eksportashon entre paisnan i desaroyo ekonónomiko inklusivo.

Tambe a kombèrsá tokante posibel kolaborashon riba diferente tereno manera turismo, kuido mediko komplementario (wellness), desaroyo rural i agrikultura i tambe di desaroyo di e sektor kreativo (orange economy). E último ta un tema prinsipal pa Presidente elekto Ivan Duque i alabes ta forma parti di Kòrsou su plan di desaroyo nashonal (NDP). Promé Minister Rhuggenaath a trese dilanti e memorandum di entendimiento ku tin kaba entre Kòrsou i Colombia i ku na sèptèmber ta bai tin un mishon pa empresarionan di Kòrsou bishitá Colombia.

Riba djaluna 6 di ougùstùs tambe ta tin un enkuentro entre Promé Minister Rhuggenaath i Vise-Presidente entrante, Marta Lucia Ramirez, huntu ku Minister di Relashonnan Eksterior Carlos Holmes Trujillo i Minister di Komersio, Industria i Turismo José Manuel Restrepo. Varios tereno di interes komún, manera kolaborashon komersial, un aserkamento regional pa atendé ku migrashon for di Venezuela i tambe e nesesidat pa traha huntu den kombatimentu di kriminalidat organisá en general (trafiko di droga i arma) den region Karibe.

A para ketu na enforsá relashonnan bilateral entre Kòrsou ku Colombia i tambe e otro paisnan den Reino. Promé Minister a trese dilanti ku tin potensial enorma prinsipalmente pa hobènnan talentoso riba tereno kultural, arte i tambe produktonan digital manera animashon i weganan elektroniko, den kuadro di industria kreativo (orange economy) . Den e kuadro di inovashon, deserayo di empresa chikí i sektor kreativo, por wak kon Kòrsou i Colombia por yuda otro. I tambe a papia riba e mishonnan ekonómiko ku ta pendiente den sèptèmber i novèmber próksimo ku partisipashon di Hulanda, Kòrsou i Aruba.

Embahador di Reino, Jeroen Roodenburg, a para ketu na e sostèn kontinuo di Hulanda den e akuerdo di pas ku FARC i negosashonnan pendiente ku ELN. Pas, stabilidat i desaroyo inklusívo ta importante pa henter region di ‘Gran Caribe’, i paisnan di Reino ta prepará pa traha huntu ku Colombia pa avansá esaki. Vise-Presidente entrante di Colombia tabata hopi agradesido pa representashon di Reino na Bogota, den persona di Promé Minister di Kòrsou.

Ministerio konserní

Bo opinion