Notisia

Promé Minister Rhuggenaath ta fortalesé lasonan na Panama

Geplaatst op 12 Mart 2018 dor di Ministerio di Asuntunan General i Promé Minister

Willemstad - Durante un biahe di trabou pa Panama di dos dia, 7 i 8 di mart 2018, ku e meta pa sigui habri e portanan i pa fortalesé relashonnan den region, Promé Minister Eugene Rhuggenaath a bishitá Panama, un di e paisnan ku tin mas potenshal di kresementu den nos region. Ku e kanal di Panama komo pilar ekonómiko stabil, ta hasi di Panama un pais ku ta brinda diferente posibilidat di koperashon bilateral. Dos dia kargá ku reunionnan interesante a hasi e di e biahe di trabou aki unu sumamente produktivo pa fortalesé lasonan na Panama.

Komo parti di e programa, Promé Minister Rhuggenaath a hiba kòmbersashon ku Presidente de la República de Panama, Juan Carlos Varela Rodrigues, huntu ku Vicepresidente i Minister di Relashonan di Eksterior, Isabel de Saint Malo de Alvarado i Embahador di Reino Hulandes na Panama Dirk Janssen, riba tópikonan di importansia pa nos paisnan. Na sèptèmber 2017 Promé Minister ya a topa ku Presidente Varela durante e Reunionnan General di Nashonnan Uní na New York.

Promé Minister Rhuggenaath tambe a reuní ku Minister di Desaroyo Agrikultural di Panama, Eduardo Carles i ta interesante pa sa kon e desaroyonan riba e tereno di agrikultura ta trese oportunidatnan nobo pa kompanianan lokal i internashonal, pa krese den e merkado di produkshon, fabrikashon i eksportashon di produkto agrikultural. Panama mas i mas ke posishoná su mes no solamente komo e pais ku ta manehá e kanal sino tambe e pais ku ta eksportá produkto i servisio na gran skala.
A papia tambe kon kompanianan Hulandes ku ya ta hasi uso di e oportunidatnan ku Panama ta brinda i sigur ta interesante pa wak kon nos lo por kolaborá bilateralmente di moda ku tur tres pais ta benefisiá. Por ehèmpel, aquakultura òf kultivashon di piská i kon pa hasi esaki, fruta i bèrdura yega nos isla(nan) di un forma mas barata i mas lihé, direktamente for di Panama. Minister Carles a mustra un interes serio pa ku un mishon komersial den futuro serkano.
Ademas Promé Minister Rhuggenaath a reuní ku Vice Minister di Komersio Néstor González. E enkuentro aki a sirbi pa deliberá riba e posibilidatnan den e.o. e areanan di logístika maritimo pero tambe a toka e sifranan aktual di fluho di produktonan for di Panama pa Kòrsou. Tur esaki a kontribuí, pa krea un bista riba e oportunidatnan komun di negoshi entre e paisnan. Minister González a menshoná ku lo plania un mishon komersial di Panama pa Kòrsou. Adishonalmente Minister González a duna di konosé ku e hasta ta konsiderá pa establesé un ofisina komersial di Panama na Kòrsou.

Durante su bishita na Panama, Promé Minister Rhuggenaath tambe a reuní ku representantenan di Copa Airlines. Presidente Ehekutivo i CEO di e kompania, Pedro Heilbron, i su tim tin perspektiva hopi positivo pa e merkado di Kòrsou. Komo konsekuensha di esei, a para ketu na e bon notisia ku COPA ta bai bula diariamente entre Panama i Kòrsou for di 17 di yüli 2018.

Promé Minister Rhuggenaath a forma parti tambe di e apertura di e eksposishon 'Jewish Treasures of the Caribbean'. Un kolekshon di potrèt di e fotografo Merikano Wyatt Gallery, ku durante un temporada a biaha pa un gran kantidat di pais den Karibe ku su pashon pa sakamentu di potrèt. E eksposishon ta konta e historia impreshonante di Hudiunan Sefárdiko ku mester a mobilisá di Europa pa diferente pais na mundu, hopi di nan a biaha via di Kòrsou, entre otro pa Panama. Te e dia di awe e generashonnan na bida tin hopi amor pa e historia i laso familiar entre Kòrsou i Panama. Tabata un anochi interesante ku varios hende ku fam di famia konosí na Kòrsou ku por a papia i kanta algun palabra Papiamentu. Kòrsou ta biba bou di e grupo aki na Panama i Minister Presidènt Rhuggenaath a ekstendé su invitashon pa nan bin bishitá nos isla. Ku gran satisfakshon Promé Minister Rhuggenaath a regresá Kòrsou kla pa kontinuá na duna kontenido na e relashon eksterior ku Panama.

Ministerio konserní

Bo opinion