Notisia

Proposishon Areglo di Disputa pa “Tweede Kamer” no opstante notanan marginal di Kòrsou

Geplaatst op 27 Novèmber 2018 dor di Ministerio di Asuntunan General i Promé Minister

Willemstad - Dia 23 di novèmber último, Konseho di Minister di Reino (mihó konosí komo RMR) a bai di akuerdo pa entregá un proposishon nobo pa un Lei di Reino pa regla Disputa (Rijkswet Koninkrijksgeschillen) na Parlamentonan di Reino.

Den e reunion di RMR, Kòrsou a duna di konosé di no ta di akuerdo ku e proposishon di e Lei di Reino pa regla Disputa, ni tampoko ku e proposishon pa entregá e Lei di Reino menshoná na e Parlamentonan di Reino. Kòrsou a proponé pa wanta ku e tomo di desishon riba e Lei pa asina krea oportunidat di konsulta riba nivel Atministrativo i Gubernamental – inkluso e Parlamentonan di Reino.

Un Areglo di Disputa ta di gran importansia pa Reino Hulandes. E Legisladónan di Statüt finalmente a duna enkargo pa bin ku un solushon independiente enkuanto disputanan ku por surgi basá riba interpretashon di e stipulashonnan di Statüt.

E kuater (4) paisnan di Reino tambe tin interes den un areglo ku ta gosa di sosten total ku konsekuentemente ta kumpli ku meta di e legisladó di Statüt na 2010. No opstante ku e proposishon, manera adaptá konforme Konseho di Estado di Reino (Raad van State), na opinion di Kòrsou ainda no ta kumpli sufisientemente ku e prinsipionan di e legisladónan di Statüt i e Parlamentonan establesé den e IPKO di mei 2015, e ta kontené puntonan di referensia balioso pa un proposishon ku por gosa di un base amplio di sosten. Kabinèt Rhuggenaath ta premirá un prosedura parlamentario intensivo kaminda ta debatí a base di kontenido, ku e ophetivo di yega na un areglo ku por konta ku un plataforma general.

Ministerio konserní

Bo opinion